ՀՀԿ-ն մեր մոտ դաժե քարոզարշավ չի անում․ մենք դրանց տուժածներն ենք. սարիթաղցիները շարունակում են նստացույցը.Տեսանյութ

Կալանավորված սարիթաղցիների հարազատներն արդեն մի քանի օր է նստացույց են իրականացնում Գլխավոր դատախազության շենքի առաջ՝ պահանջելով ազատ արձակել 10 սարիթաղցիներին, ովքեր կալանավորվել են 2016թ. հուլիսի 19-ին Սարի թաղում ոստիկանների հետ բախումներից հետո։

Նստացույցի մասնակից, գործով կալանավորվածներից Հարություն Թորոսյանի եղբայրը՝ Թորոս Թորոսյանը, Դատախազությունից պահանջում է փոխել տղաներին առաջադրված մեղադրանքը, քանի որ այն` ինչ առաջադրվել է նրանց, իրականությանը չի համապատասխանում:

Գործով կալանավորված 9 անձանց մեղադրանք է առաջադրվել ՀՀ քրեական օրենսգրքի 316 հոդվածի 2-րդ մասի հատկանիշներով (իշխանության ներկայացուցչի նկատմամբ վտանգավոր բռնություն գործադրելը): Մեղադրանքը հաստատվելու դեպքում նրանց սպառնում է 5-ից 10 տարվա ազատազրկում:

Թորոս Թորոսյանը նշեց, որ իրենց պահանջն է 316 հոդվածի 2-րդ մասի հատկանիշներով առաջադրված մեղադրանքը փոխել առաջին կետով՝ այսինքն՝ եթե գործողություն է տեղի ունեցել, ապա դա կենցաղային հողի վրա վիճաբանություն է. «Ոչ մի ծանր վնասվածք չկա, սաղ հեքիաթ ա»:

«Հիմա նախընտրական շրջան է, ես շատ կուզենայի դիմել ՀՀԿ-ին, որ ուշադրություն դարձնեն այս խնդրին՝ փոքր քաղաք է ու մի թաղամասից կա 10 կալանավոր, իսկ եթե իրենք ի վիճակի չեն լուծում տալ այս խնդրին, ես կցանկանայի դիմել Գագիկ Ծառուկյանին»,- նշեց Թորոս Թորոսյանը: