Կարող է ամռանը ձյուն էլ գալ. Ռուստամյանը՝ Սեյրան Օհանյանի հայտարարության մասին
Խելացի հայտարարություն են կատարել, որովհետեւ ֆորս-մաժոր միշտ կարող է լինել: Այս մասին, այսօր՝ հունիսի 7-ին, ԱԺ-ում լրագրողների հետ զրույցում նշել է ՀՅԴ խմբակցության ղեկավար Արմեն Ռուստամյանը՝ անդրադառնալով Սեյրան Օհանյանի հայտարարությանը՝ թե արտախորհրդարանական ուժերը կարող են միավորվել եւ երկրում կարող են ֆորսմաժորային զարգացումներ լինել:«Ոչ մի բան բացառել չի կարելի, այն էլ այս մեր վիճակում», - ասաց պատգամավորը:
Դիտարկմանն արդյոք ինքը տեսնում է իշխանափոխության անհրաժեշտություն, Ռուստամյանն ասաց, որ ինքը երբեք ոչինչ չի բացառել. «Դուք ասում եք ընդհանրապես իշխանափոխություն, ընդհանրապես ամեն ինչ էլ կարող է գալ, կարող է ամռանը հանկարծ ձյուն էլ գալ»:
Ռուստամյանի խոսքով՝ արտախորհրդարանական ուժերը միավորվելու ցանկություն ունենալու պարագայում կարող են գտնել նաեւ միջոցները. «Դա իրենց գործն է»:
Նշենք, որ նախօրեին «Ազատության» հետ զրույցում Սեյրան Օհանյանը հայտարարել էր, որ մնում է քաղաքականության մեջ եւ պայքարելու է իշխանափոխության համար։ Նա նաեւ չէր բացառում, որ խորհրդարանից դուրս զարգացումները կարող են բերել ֆորս մաժորի:
