«Սասնա ծռերի» պաշտպանների համատեղ հայտարարությունը

Հայտարարության մեջ, մասնավորապես, ասվում է. «Հունիսի 8-ին ժամը 14:00-ին Էրեբունի եւ Նուբարաշեն վարչական շրջանների առաջին ատյանի դատարանում նախագահությամբ դատավոր Ա. Գաբրիելյանի սկսվեց 14 անձանց վերաբերյալ գործի դատական քննությունը: Դատական նիստը սկսվելուց րոպեներ անց հետաձգվեց (ըստ նախագահող դատավորի՝ ընդմիջվեց), ենթադրաբար աղմուկի պատճառով:

Անկախ նիստի հետաձգման պաշտոնական հայտարարված պատճառներից գտնում ենք, որ այն ի սկզբանե դատապարտված էր հետաձգման:

Ակնհայտ եւ պարզ էր, որ դատարանի թիվ 1 դահլիճում հնարավոր չէր այդ նիստն անցկացնել: Դահլիճում բացակայում են ամենատարրական պայմանները 14 անձանց վերաբերյալ գործ քննելու համար: Այս պարզ իրողությունը անտեսվել է դատարանի կողմից, ինչն իրավաչափորեն եւ արդարացիորեն հանգեցրեց բազմաթիվ դժգոհությունների եւ այսպես կոչված աղմուկի:

Փաստացի արհեստականորեն ստեղծվել էին այնպիսի պայմաններ, որ դժգոհություն («աղմուկ») առաջանա եւ նիստը հետագվի:

Հայաստանի Հանրապետության անունից հանդես եկող եւ դատական ակտ կայացնող դատարանը պարտավոր էր կատարել իր պարտականությունները՝ ստեղծել դատական քննության անցկացման պատշաճ պայմաններ, ինչը չէր կատարվել: Հետեւաբար անթույլատրելի է նիստի հետաձգումը պատճառաբանել «աղմուկով», ինչը դատարանի պարտականությունների չկատարման եւ անշրջահայացության հետեւանք էր:

Հայտարարում ենք, որ դատարանը պարտավոր է ապահովել պատշաճ պայմաններ դատական նիստերը օրենքով սահմանված կարգով անցկացնելու համար, ներառյալ՝ ապահովել աշխատանքային պայմաններ պաշտպաններիս համար, հրապարակային դատաքննության ստանդարտներ՝ հաշվի առնելով գործի հանրային հնչեղությունը, պաշտպաններիս եւ մեր պաշտպանյալների դահլիճում անարգել եւ առանց որեւէ սահմանափակման հաղորդակցում, պաշտպաններիս (փաստաբաններիս) զննության կամ խուզարկության բացառում:

Դատարանի կողմից համապատասխան միջոցներ չձեռնարկելը կվկայի, որ գործի քննության ցանկացած բնույթի հետաձգումը, դատարանում «աղմուկը» կամ այլ՝ ոչ դատավարական իրավիճակի ստեղծման ամբողջ պատասխանատվությունը կմնա դատարանի վրա»:

Հայտարարությունը տարածել են փաստաբաններ՝

Մուշեղ Շուշանյան

Տիգրան Եգորյան

Տիգրան Հայրապետյան

Երվանդ Վարոսյան

Լուսինե Սահակյան

Արմինե Ֆանյան

Ինեսսա Պետրոսյան

Լուսինե Հակոբյան

Հարություն Բաղդասարյան

Դավիթ Գյուրջիյան

Մարինե Ֆարմանյան