Թրամփն անհարբերությամբ սպասում է Պուտինի հետ հանդիպմանը
ԱՄՆ նախագահ Դոնալդ Թրամփը հայտնել է, որ անհամբեր սպասում է Ռուսաստանի նախագահ Վլադիմիր Պուտինի հետ հանդիպմանը գերմանական Համբուրգում մեկնարկող «Մեծ քսանյակի» (G20) գագաթնաժողովի շրջանակում: Այս մասին նա գրել է Twitter-ում: «Ես անհամբեր սպասում եմ համաշխարհային առաջնորդների հետ բոլոր հանդիպումներին, այդ թվում՝ Վլադիմիր Պուտինի հետ հանդիպմանը: Քննարկելու շատ բան կա», - գրել է նա:
Հայտնի է, որ ԱՄՆ-ի և Ռուսաստանի նախագահների հանդիպումը կկայանա տեղական ժամանակով ժամը 17:45-ին և կտևի մոտ մեկ ժամ: Կրեմլի հաղորդմամբ՝ հանդիպումը լիարժեք ձևաչափով կանցկացվի։ Ավելի վաղ լրատվամիջոցները հայտնել են, որ բանակցություններին կմասնակցեն ԱՄՆ պետքարտուղար Ռեքս Թիլերսոնը, Ռուսաստանի արտգործնախարար Սերգեյ Լավրովը և թարգմանիչներ: РИА Новости-ն գրում է, որ առաջնորդները կքննարկեն ԱՄՆ-ում ռուսական դիվանագիտական սեփականության կալանման հարցը և միջազգային թեմաներ, այդ թվում՝ Սիրիան և Ուկրաինան:
Հիշեցնենք, որ «Մեծ քսանյակի» (G20) գագաթնաժողովն այս տարի կանցկացվի հուլիսի 7-8-ը՝ գերմանական Համբուրգ քաղաքում:
