«Ես որևէ կուսակցության անդամ չեմ ուզում դառնալ, նույնիսկ՝ Ձեր, պարոն Փաշինյան». Արմեն Սարգսյան
«Ես հավաստում եմ իմ հարգանքը ձեր կենսագրության և ձեր հանդեպ»,- այսօր Ազգային ժողովում հայտարարեց «Ելք» խմբակցության պատգամավոր Արտակ Զեյնալյանը՝ դիմելով ՀՀ նախագահի թեկնածու Արմեն Սարգսյանին:Նա հարցրեց Ա. Սարգսյանի՝ Մեծ Բրիտանիայի քաղաքացիության դադարեցման վերաբերյալ. «Եթե անձը ՀՀ քաղաքացի է, նա կարող է նաև այլ երկրի քաղաքացի լինել, սակայն Սահմանադրությունն արգելք է դնում երկքաղաքացիություն ունեցող անձանց համար նախագահի ընտրության հարցում: Բրիտանական քաղաքացիության մասին օրենքի համապատասխան՝ քաղաքացիությունը դադարում է, երբ քարտուղարը համապատասխան գրառում է կատարում: Այդպիսի գրառում կատարվե՞լ է, և ե՞րբ է դա արվել»:
Ի պատասխան՝ Ա. Սարգսյանն ասաց. «Ես՝ ՀՀ քաղաքացի լինելով, դիմել եմ Բրիտանիայում մշտական կեցության, հետո՝ քաղաքացիության համար՝ 2000 թվականին, երբ ազատվեցի դեսպանի պաշտոնից: Դրանից հետո ես պետական ծառայության մասին չէի մտածում ու մտածում էի՝ իմ կյանքն այլ ուղիով պետք է գնա: Բայց այդ բոլոր տարիներին ես ինձ որպես ՀՀ քաղաքացի եմ զգացել: Դուք ճիշտ եք, որ կարևոր է, թե երբ է անձը դիմել իր քաղաքացիությունից հրաժարվելու համար: Կան անհատներ, որոնք ունենք կրկնակի քաղաքացիություն, ու այդ անհատների համար մերժման գործընթաց չկա: Այսինքն՝ անհատը ստանում է իր ցանկությունը»:
Ա. Սարգսյանը պնդեց, որ 2011 թվականի դեկտեմբերի 2-ից ինքը միայն ՀՀ քաղաքացի է:
Ա. Զեյնալյանն ասաց, թե Ա. Սարգսյանը պետք է որ ստացած լինի քարտուղարի գրառումը: Նա հետաքրքրվեց՝ կարո՞ղ է նա հրապարակել դա:
Ա. Սարգսյանը պատասխանեց. «Ես 2011 թվականի դեկտեմբերի 2-ին, երբ չէի կարող անգամ երազել, որ ՀՀ Սահմանադրությունը կարող էր փոխվել, և ես կարող էի կանգնած լինել ձեր առջև այսօր՝ որպես նախագահի թեկնածու, դիմել եմ, ու միայն ՀՀ քաղաքացի եմ»:
«Ելք» խմբակցության մեկ այլ պատգամավոր՝ Մանե Թանդիլյանն էլ նկատեց, որ Ա. Սարգսյանը միակ թեկնածուն է, ու անիմաստ է խոսել այն մասին, որ նա կարող է չընտրվել: Նա հետաքրքրվեց, թե դա արդյոք չի՞ մտահոգում Ա. Սարգսյանին. «Մտահոգություն չունե՞ք, որ դուք ոչ թե՝ ընտրվում, այլ՝ նշանակվում եք նախագահ ՀՀԿ-ի կողմից: Դուք հնարավո՞ր եք համարում, որ կարող եք գլխավորել ՀՀԿ ցուցակը և առաջադրվել՝ որպես վարչապետի»:
Ի պատասխան՝ Ա. Սարգսյանն ասաց. «Սահմանադրությունը ես չեմ գրել, ընդամենը քվեարկել եմ այդ Սահմանադրության համար: Սա ինձ ուղղված հարց չէ, այլ հարց է՝ ուղղված ձեզ: Ես անձամբ հանդիպել եմ ձեր թեկնածուին՝ Արտակ Զեյնալյանին, հայտնաբերել եմ շատ խելացի, պրոֆեսիոնալ մարդու, որոշ հարցերում ընդհանրություն ունենք, եթե ընտրվեմ՝ ուրախությամբ իր հետ կաշխատեմ: Ես պատրաստ կլինեմ իր գաղափարներին աջակցել: Ինչ վերաբերում է երկրորդ հարցին, ես որևէ կուսակցության անդամ չեմ ուզում դառնալ, նույնիսկ՝ Ձեր, պարոն Փաշինյան»:
