«Սահմանադրությունը վերածվել է հեքիաթագրքի». Գեւորգ Պետրոսյան
Հեքիաթի է վերածվել մեր կյանքը եւ հեքիաթագրքի է վերածվել մեր Սահմանադրությունը: Այս մասին, այսօր՝ ապրիլի 10-ին, ԱԺ-ում հայտարարությունների ժամին նշեց «Ծառուկյան» խմբակցության պատգամավոր Գեւորգ Պետրոսյանը:«Այդ հեքիաթի առաջին հոդվածն ասում է՝ Հայաստանը սոցիալական, ժողովրդավարական, ինքնիշխան եւ իրավական պետություն է, մինչդեռ հայաստանն իր անգութ հարկային վարչարարությամբ եւ մարդկային կապիտալի նկատմամբ նյութական կապիտալի իշխանությունն ամրագրող պետություն է:
Հեքիաթի հաջորդ հոդվածը սահմանում է, որ ՀՀ-ում իշխանությունը պատկանում է ժողովրդին, միչդեռ ժողովուրդն է պատկանում իշխանությանը: Եվ հեքիաթի հուզական մասը ասում է, որ ՀՀ-ում բարձրագույն արժեքը մարդն է: Իրականում, ցավոք, կառավարության անդուլ ջանքերի հետեւանքով մարդը ամենաանպաշտպան ու ցածր արժեքն է»,-ասաց նա:
Այնուհետեւ նա անդրադարձավ ՀՀ նորընտիր նախագահին՝ նշելով.
«Խորհուրդ ունեմ նորընտիր նախագահին: Եթե նոր նախագահը չունի այնպիսի լծակներ, որոնք ուներ նախկին նախագահը, ապա ինչու ենք ստեղծել նախագահի ինստիտուտը եւ դա իրականում ինչի է հավակնում: ՀՀ Սահմանադրության 123-րդ հոդվածի համաձայն, նախագահը հետեւում է Սահմանադրության պահպանմանը: Դա չի նշանակում վարագույրի հետեւից խնամքով հետեւել, թե ինչ է կատարվում կյանքում: Եթե Սահմանադրության առաջին երեք հոդվածները գտնվեին նախագահի ուշադրության կենտրոնում, այստեղ իսկապես կարող էինք պնդել, որ իսկապես նորընտիր նախագահը հետեւում է Սահմանադրության պահպանմանը»:
