Ինչպես են Հյուսիսային պողոտայից 2-ամյա երեխային առևանգում և ինչպես է Ոստիկանությունը պարզաբանում նրա գտնվելու վայրի մասին

Արդեն տեղեկացրել ենք, որ ՀՀ ոստիկանության հասարակայնության հետ կապի եւ լրատվության վարչության փոխանցմամբ, այս տարվա մայիսի 5-ին՝ ժամը 16:20-ին, ոստիկանություն ահազանգ է ստացվել մի քաղաքացուհուց, որ իր նախկին ամուսինը Հյուսիսային պողոտայից գողացել է իր երեխային։
Նշել ենք նաև, որ անչափահասին հայտնաբերելու նպատակով ոստիկանության ծառայողները բազմիցս այցելել են անչափահասի հոր եւ նրա հարազատների բնակարաններ, սակայն երեխան չի հայտնաբերվել։

Երեկ, երեխայի մայրը բաց նամակով դիմել է վարչապետ Նիկոլ Փաշինյանին՝ նշելով, որ անցել է գրեթե մեկ ամիս, սակայն ինքը չի կարողանում գտնել իր փոքրիկ որդուն:

Իսկ ահա Ֆեյսբուքյան օգտատերերից մեկը բաց նամակով դիմել էր ՀՀ Ոստիկանության պետ Վալերիյ Օսիպյանին՝ մեղադրելով ոստիկանությանը, որ չի կարողանում գտնել իր 2-ամյա որդուն։
Խնդրին՝ 23.05.2018 թ. անդրադարձել էր փաստաբան Տիգրան Աթանեսյանը, ինչի շուրջ, նույն օրը, police.am կայքում տրվել է պարզաբանում։ Ի հավելումն, հայտնում ենք, որ 25.05.2018 թ. Հովհաննես Պ.-ն ներկայացել է Կենտրոնի քննչական բաժին, որտեղ էլ ոստիկանության Կենտրոնականի բաժնի ծառայողը դիմումի շրջանակներում բացատրություն է վերցրել նրանից։ Հովհաննես Պ.-ն հայտնել է, որ իր երեխաները գտնվում են իր մոտ և ինքը չի պատրաստվում վերադարձնել նրանց մորը, քանի որ վերջինս պատշաճ չի խնամում երեխաներին։

Հովհաննես Պ.-ն հայտնել է, որ Երևան քաղաքում ունի տարբեր բնակության վայրեր, ամեն օր իր գտնվելու հասցեն փոխում է, և չի նշել իր բնակության ստույգ հասցեն։
Նույն օրը ոստիկանության Կենտրոնականի բաժին է հրավիրվել ՀՀ ԱՆ ԴԱՀԿ ապահովող ծառայության հարկադիր կատարողը, ով Հովհաննես Պ.-ին պարտավորեցրել է երեխաներին վերադարձնել իրենց մորը։