ԱԱԾ-ն գործողություններ է իրականացնում քրեական հեղինակություն Արտյոմ Կանևսկոյի գրասենյակում
Armtimes.com-ը գրում է.Մեր տեղեկություններով՝ ՀՀ ազգային անվտանգության ծառայությունը արդեն մի քանի ժամ է խուզարկություն է սկսել Հալաբյան փողոցում գտնվող գրասենյակներից մեկում:
Նույն տեղեկություններով, այդ գրասենյակը պատկանում է քրեական հեղինակություն Արտյոմ Կանեւսկոյին:
ՀՀ ԱԱԾ մամուլի քարտուղար Սամսոն Գալստյանը մեր հարցին ի պատասխան միայն ասաց հետեւյալը. «Որոշակի գործողություններ իրականացվում են, կտրվի լրացուցիչ տեղեկատվություն»:
Չի բացառվում, որ այս գործողությունը կապված լինի ԱԱԾ-ում քննվող Դոն Պիպոյի դեմ սպանության նախապատրաստման գործի հետ: Մամուլում բազմիցս տեղեկություններ են շրջանառվել, որ Դոն Պիպոյի դեմ մահափորձի պատվիրատուն Արտյոմ Կանեւսկոյն է:
Հիշեցնենք, որ Արթուր Ասատրյանը մեղադրվում է Քրեական օրենսգրքի 131-րդ հոդվածի 1-ին, 2-րդ, 3-րդ եւ 6-րդ կետերով (մի խումբ անձանց կողմից նախնական համաձայնությամբ, առողջության համար վտանգավոր բռնություն գործադրելով, զենքի կամ որպես զենք օգտագործվող առարկաների գործադրմամբ, երեք անձի առեւանգումը) եւ 235-րդ հոդվածի 2-րդ մասով (Մի խումբ անձանց կողմից նախնական համաձայնությամբ հրազեն եւ ռազմամթերք ապօրինի կերպով ձեռք բերելը եւ պահելը) նախատեսված հանցագործություն կատարելու մեջ: Առեւանգման գործի շրջանակներում եւս 4 անձ է ձերբակալվել, որոնք, ԱԱԾ-ի հաղորդմամբ` Ռուսաստանի Դաշնության քաղաքացիներ են:
