Պատերազմից վերադարձած կռվողները դարձան մուրացկան, իսկ թալանչիները՝ օլիգարխ
Շատ ազատամարտիկներ այսօր սովահար են լինում, չեն կարողանում ընտանիք պահել, անգամ դեղամիջոցների գումար չունեն՝ ասում է ազատամարտիկ, գնդապետ Աիդա Սերոբյանն ու շարունակում, որ իրենց լիմուզին ու ինքնաթիռ պետք չեն, այլ՝ վերաբերմունք: Արածը պետք է գնահատել։ Աիդա Սերոբյանը հույս ունի, որ նոր կառավարության շնորհիվ ազատամարտիկների սոցիալական կարգավիճակի խնդիրները վերջապես կլուծվեն. «Պատերազմից վերադարձած կռվողները դարձան մուրացկան, իսկ թալանչիները՝ օլիգարխ: Աղդամն ազատագրեցինք և դեռ օդանավակայան չհասած՝ այն արդեն թալանված էր: Պատերազմում կռվածները կորցրին ամեն ինչ»։ Նա կոչ է անում նոր իշխանություններին ազատամարտիկների բնակարանային խնդիրներն առաջնահերթության կարգով լուծել։ Ասում է, որ ՊՆ-ից բացի Երևանի քաղաքապետարանն էլ կարող է տներ տալ ազատամարտիկներին։
