ՍԱՊԾ-ը չի կարող վերահսկել.Օգտագործում ենք կերակրի՞, թե՞ տեխնիկական աղ. ՍԱՊԾ պետը՝ ահազանգի մասին
Օրեր առաջ ՀՀ-ում աղի արտադրության միակ ձեռնարկությունը՝ «Ավանի աղի կոմբինատի» տնօրենը, Արեգ Ղուկասյանն ահազանգել էր Հայաստանում հանրությունը կերակրի աղի փոխարեն տեխնիկական աղ է օգտագործում՝ չիմանալով, որ դա սննդում օգտագործել չի կարելի:Աղի կոմբինատի տնօրենը նաև ասաց, որ իրանական աղը շուկայում վաճառվում է առանց մակնշման:
Araratnews.am-ը կապ հաստատեց սննդամթերքի անվտանգության պետական ծառայության (ՍԱՊԾ) ղեկավար Գեորգի Ավետիսյանի հետ՝ խնդրի մասին պարզաբանում լսելու: ՍԱՊԾ պետն ասաց, որ վերոնշյալ տեղեկությունը մի փոքր չափազանցված է: «Մենք չենք հայտնաբերել սննդի մեջ օգտագործվող տեխնիկական աղ: Եղել են դեպքեր, երբ հայտնաբերել ենք տեխնիկական աղ մակնշումով եւ արդյունաբերական աղ՝ սննդի տեխնոլոգիաներում օգտագործելու համար: Կա պանրի, երշիկի արտադրություն, որտեղ կերակրի աղ, որի մեջ կա, յոդ, օգտագործել չի թույլատրվում»,- ասաց պրն Ավետիսյանը:
Տեխնիկական աղի ներկրումը, Գեորգի Ավետիսյանի խոսքով՝, ՍԱՊԾ-ը չի կարող վերահսկել. «Ներմուծման ժամանակ, եթե աղը տեխնիկական է, ՍԱՊԾ աշխատակիցները դա չեն իմանում: Մենք ուշադրություն ենք դարձնում կերակրի աղին՝ յոդի պարունակությունը ստուգելով»,- ասաց ՍԱՊԾ պետը:
Գեորգի Ավետիսյանի խոսքով՝ սպառողները պիտի ուշադրություն դարձնեն՝ ինչ է մակնշված արտադրանքի, տվյալ դեպքում աղի վրա:
Մեր հարցին՝ եղե՞լ են դեպքեր, երբ ՍԱՊԾ-ը հայտնաբերի նաև առանց մակնշման աղի վաճառք, պատասխանը դրական էր՝ այո: Սակայն հայտնաբերելուց հետո իրացնողին հանձնարարվել է մակնշել արտադրանքը: «Խնդրի մասին վերջնական ուսումնասիրությունը կլինի առաջիկայում»,- ասաց ՍԱՊԾ պետը:
