Գները տարօրինակ բարձր են. գնում եմ ԿԲ նախագահի հետ հանդիպման՝ գնաճի թեման քննարկելու. Նիկոլ Փաշինյան
Ահազանգեր կան, որ շուկան թանկ է, ուզեցի համոզվել, նաև պատճառները հասկանալ: Այս մասին, այսօր՝ ԳՈՒՄ-ի շուկայում լրագրողների հետ զրույցում նշեց ՀՀ վարչապետ Նիկոլ Փաշինյանը:«Հիմնականում համոզվեցի, որ օրինակ, պոմիդորի, վարունգի, սմբուկի ու մի շարք էս սեզոնի կարևոր բանջարեղենների գները, իսկապես, տարօրինակ բարձր են, և ընդհանրապես, տարօրինակ է, որ այս սեզոնին ջերմոցային լոլիկ եւ վարունգ է հայտնվել շուկայում, որովհետև Հայաստանի համար մի քիչ անսովոր է: Այս սեզոնին պետք է, որ դաշտի բանջարեղեն լինի», - նշեց Փաշինյանը:
Անդրադառնալով ոռոգման խնդրին, վարչապետը նշեց, որ խնդիր կա, բայց պետք հասկանալ, թե խնդիրը որն է. խնդիրն այն է, որ ջուր չկա՞, թե կա, բայց վատ է օգտագործվում և ոմանք չարաշահումներ են անում. «Ես պնդում չեմ անում, ես ասում եմ, որ այդպիսի խնդիրներ կան. քանի դեռ հիմնավոր բան չկա, չեմ կարող պնդել»:
Հարցին, թե գյուղմթերքի գներին ծանոթանալուց հետո, ինչ քայլ է հաջորդելու, Փաշինյանը պատասխանեց. «Հիմա գնում եմ ԿԲ նախագահի հետ հանդիպման՝ գնաճի թեման նաև քննարկելու»:
