Ի գիտություն «Շերեմետևո» օդանավակայանով թռչողներին.կարևոր նորամուծություն
Բոլոր այն մարդիկ, ովքեր պատրաստվում են մոսկովյան միջազգային «Շերեմետևո» օդանավակայանով թռչել, պետք է իմանան մի կարևոր նորամուծության մասին։ Այսուհետ ուշացող ուղևորների անուններն ու ազգանունները չեն հայտարարվի։Այս մասին ՌԻԱ Նովոստիին հայտնել է օդանավակայանի մամուլի ծառայությունը։
««Շերեմետևո» միջազգային օդանավակայանը հայտնում է ուղևորների ծանուցման համակարգի փոփոխությունների մասին։ Դա կապված է 2006 թվականի հուլիսի 27–ի «Անձնական տվյալների մասին» դաշնային օրենքի պահպանման հետ։ Հիմա «Շերեմետևոյի» տեղեկատվության ծառայության հաղորդավարները ընդհանուր կհիշեցնեն, որ անհրաժեշտ է շտապ նստեցման գնալ (նշելով չվերթի համարը)։ Կոնկրետ անձի ազգանունը չի բարձրաձայնվելու», – նշվում է հաղորդագրության մեջ։
Այս փոփոխությունը վերաբերում է բոլոր տեսակի ուղևորներին, ցանկացած ավիաընկերության՝ ցանկացած դասի թռիչքներին, որոնց սպասարկում է «Շերեմետևո» օդանավակայանը։
Ավելացնենք, որ տվյալ պահին տեղեկություն չկա, արդյո՞ք ռուսական այլ օդանավակայաններ իրենց աշխատանքում նման փոփոխություն կանեն, թե ոչ։
