Կալանավորման որևէ հիմք չկար.Հայկ Սարգսյանի ընկերները պատրաստ են եղել վճարել 50 մլն դրամ գրավը
Երևանի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանի որոշմամբ Ալեքսանդր Սարգսյանի որդի Հայկ Սարգսյանի խափանման միջոցը փոխվեց և նա 50 մլն դրամ գրավի դիմաց ազատ արձակվեց: Հայկ Սարգսյանի շահերի պաշտպան, փաստաբան Երեմ Սարգսյանը ի սկզբանե հայտարարում էր, որ կալանքն ընդհանրապես պետք է վերացվի: Primenews.am-ի թղթակցի հետ զրույցում նա կատարվածը կարճ որակեց` արդարությունը վերականգնվեց: «Կալանավորման որևէ հիմք չկար: Վարույթ իրականացնող մարմինը գտել էր, որ 2018 թ. հուլիսի 4-ին ստորագրությունը լիարժեք բավարար էր, որպեսզի խոչընդոտման վտանգը կանխվի: Փաստում եմ, որ կալանքի հիմք ընդհանրապես գոյություն չունի»:
Անդրադառնալով գրավի չափին փաստաբանը նշեց, որ բավականին բարձր շեմ է, որը պատրաստ են եղել վճարել Հայկ Սարգսյանի ընկերները: Հայկ Ալեքսանդրի Սարգսյանին մեղադրանք է առաջադրվել այն բանի համար, որ նա 2007 թվականի ապրիլի 1-ին` ժամը 16:00-ի սահմաններում, իր բնակության վայրի` Երևան քաղաքի Թումանյան փողոցի 11շենքի 14 բնակարանի նկուղային հարկում գտնվող սենյակում, քննությամբ չպարզված հանգամանքներում ապօրինի ձեռք բերած և պահվող, հրազեն հանդիսացող տեսակի մոդելի ատրճանակով Դավիթ Աշոտի Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել իր կամքից անկախ հանգամանքներում: Գործի հետ կաված որպես իրեղեն ապացույցներ են ճանաչվել 9մմ տրամաչափի, 7421361 ինքնաշեն դրոշմված համարի «SIG SAUER» տեսակի «P266» մոդելի ատրճանակը։ Հիշեցնենք, որ հուլիսի 11-ին դատարանը բավարարել էր ՀՀ ՔԿ ԵՔՔՎ Կենտրոն և Նորք–Մարաշ վարչական շրջանների քննչական բաժնում քննվող քրեական գործով Հայկ Սարգսյանին կալանավորելու մասին քննիչի միջնորդությունը:
