Մոռացեք 1915 թվականի Ցեղասպանությունը,Հայաստանն իր ընտրությամբ է մեկուսացվել տարածաշրջանում.Թուրքիայի խորհրդարանի նախագահ
«Եթե Հայաստանն իրոք ցանկանում է բարելավել իր հարաբերությունները Թուրքիայի հետ, ապա պետք է վերջ դնի, այսպես կոչված, Ցեղասպանության վերաբերյալ իր անհեթեթ պնդումներին։ Պետք է թույլ տա պատմաբաններին ուսումնասիրել պատմական փաստերը»,- հայտարարել է Թուրքիայի խորհրդարանի նախագահ Բինալի Յըլդըրըմը Եվրասիայի խորհրդարանների պատվիրակությունների համաժողովի ժամանակ, որն անցկացվել է Անթալիայում (Թուրքիա)։Սրանով Թուրքիան փաստացի կրկին նախապայմաններ է առաջադրել Հայաստանին՝ կապված հայ-թուրքական հարաբերությունների կարգավորման հետ։ Հայաստանն այս դեպքում մշտապես հանդես է գալիս առանց նախապայմանների՝ Ցեղասպանության ճանաչման գործընթացը հարաբերությունների կարգավորումից անկախ դիտարկելով։
Յըլդըրըմը նշել է, թե Հայաստանն իր ընտրությամբ մեկուսացվել է տարածաշրջանում։ Միևնույն ժամանակ, պարզ է, որ հենց Թուրքիան է իր դաշնակից Ադրբեջանի հետ փորձում մեկուսացնել Հայաստանը՝ նույնիսկ սեփական շահերը հաշվի չառնելու ճանապարհով։
