Դիմակավորված տասնյակ ոստիկաններ Վանաձորում են. թիրախը՝ քրեական հեղինակություններն են
ՀԺ-ի թղթակիցը Վանաձորից հաղորդում է, որ իրավապահները նաեւ զենքեր են հայտնաբերել նրանցից մի քանիսի բնակարաններում, մասնավորապես՝ ավտոմատներ: Խուզարկությունները կապված են այս տարվա հոկտեմբերի 11-ին Վանաձորում տեղի ունեցած աղմկահարույց կրակոցների հետ, որի ժամանակ դեռեւս չպարզված անձինք կրակահերթ էին իրականացրել Վանաձորի Նավ ռեստորանից դուրս եկած 2 տղամարդու վրա, որոնք, ըստ շրջանառվող լուրերի, մոսկվաբնակ քրեական հեղինակություններ են: Կրակոցներից անմիջապես հետո հանցագործները իրենց Վազ 21-07 մակնիշի մեքենայով դիմել էին փախուստի, այնուհետ այրել մեքենան:Հիշեցնենք, որ դեպքից մինչ օրս Լոռու ոստիկանները մեծամասշտաբ օպերատիվ-հետախուզական միջոցառումներ են իրականացնում մարզի ողջ տարածքում: Մեր աղբյուրի փոխանցմամբ՝ մարզային վարչության պետ Արամ Ղազարյանը բավականին խիստ է տրամադրված: Ասել է թե՝ Լոռու ոստիկանները պատերազմ են հայտարարել քրեական հեղինակություններին ու նրանց հետ առնչություն ունեցող անձանց:
