Տեղյակ չէ՞ վարչապետը, որ բանակում ոչինչ չի փոխվել. զոհված զինծառայողի հարազատներ
Արդեն մեկ ամիս է՝ գյումրեցի Հարոյանների ընտանիքում սուգ է: Մեկ ամիս առաջ Արցախի N զորամասում զոհվեց նրանց ընտանիքի փոքր որդին՝ Գևորգը:ՀՀ վարչապետի պաշտոնակատար Նիկոլ Փաշինյանն իր ելույթներից մեկում նշեց, որ Հայաստանում զգալիորեն պակասել են նման դեպքերը: Այստեղից հարց է առաջանում՝ արդյո՞ք վարչապետը տեղյակ չէ, թե ինչ է կատարվում բանակում, և ո՞վ է պատասխանատու, ինչո՞ւ նրան չի զեկուցվում, որ բանակում ոչինչ չի փոխվել և նույն պատկերն է, ինչ եղել է մինչև հեղափոխությունը: Վերջին 6 ամիսների ընթացքում արդեն 9 ինքնասպանության դեպք է գրանցվել, նշում է Գևորգի քեռին՝ Արմեն Բեգլարյանը:
Թեև Գևորգի հարազատները կտրականապես հերքում են ինքնասպանության վարկածը: Նրանք պահանջում են, որ պաշտոնապես հերքվի ինքնասպանության վարկածը՝ նշելով՝ Գևորգը չէր կարող ինքնասպան լինել, և որ նրան սպանել են:
Դեպքի առիթով հարուցվել է քրեական գործ, որի շրջանակներում ձերբակալվել են 2 անձ՝ վաշտի հրամանատարը և մեկ սերժանտ:
Զոհված զինծառայողի հարազատները պահանջում են, որպեսզի բոլոր այն մարդիկ, ովքեր պատասխանատու են այս դեպքի համար, հրաժարական ներկայացնեն: Ըստ նրա՝ «մեղավոր է նախ ՊՆ նախարար Դավիթ Տոնոյանը, ով չի տիրապետում իրավիճակին բանակում, ապա ՊԲ հրամանատար Լյովա Մնացականյանը, Արցախի նախագահ Բակո Սահակյանը և բոլոր այն մարդիկ, որոնք այս կամ այն կերպ պատասխանատու են այս ոճրագործության համար: Տվյալ միջադեպին անդրադարձել են նաև թուրքական լրատվամիջոցները՝ փորձելով սաբոտաժի ենթարկել ՀՀ նոր իշխանություններին:
«Պետք չէ թույլ տալ, որպեսզի այս դեպքը քաղաքականացվի, այլ պետք է անաչառ քննություն կատարել և համակարգը զտել ներսից, որպեսզի այլևս նման դեպքեր չլինեն: Բանակում դեռ տիրում է նույն մթնոլորտը, ինչ եղել է մինչ հեղափոխությունը, և պետք է լրջորեն զբաղվել բանակի կարգ ու կանոնով, որպեսզի ծնողներն այլևս չվախենան իրենց որդիներին բանակ ուղարկելուց»,- ասում է Արմեն Բեգլարյանը:
