Նախարար Արսեն Թորոսյանը խուսափում է հանդիպել, քննարկել ոլորտի խնդիրները՝ պատասխանելով խիստ զբաղված եմ. Տեսանյութ
Հայացք մամուլի ակումբում Հայաստանի դեղարտադրողների և ներմուծողների միության նախագահ Սամվել Զաքարյանը խոսեց դեղագործական ոլորտի խնդիրներից, ինչպես նաև Առողջապահության նախարարության վարած քաղաքականության խոչընդոտներից:Սամվել Զաքարյանը անդրադառնալով ՀՀ առողջապահության նախարարության փորձագիտական կենտրոնի գործունեությանը՝ նշեց, որ Հայաստանում դեղերի գրանցման պետական տուրքը կազմում է 900 հազար դրամ, սակայն անհասկանալի է այն, որ տվյալ դեղը վերագրանցելու համար դեղարտադրողները նորից
վճարում են նույնքան գումար. «Յուրաքանչյուր դեղ փորձաքննություն է անցնում ԱՆ դեղերի
և բժշկական տեխնոլոգիաների փորձագիտական կենտրոնում և այդ գումարը վճարում են այդ կենտրոնին: 5 տարի հետո նույն դեղը վերագրանցելու համար դեղարտադրողները նորից վճարում են 900 հազար դրամ: Եթե դեղի բաղադրությունում որևէ փոփոխություն չի եղել, ինչո՞ւ պետք է նորից նույնքան գումար վճարել: Փորձագիտական կենտրոնն ընդամենը պետք է մեկ թուղթ տպի, կնիք դնի ու տրամադրի ընկերություններին, մինչդեռ այդ թղթի համար նորից գանձում են 900 հազար դրամ»,-ասաց Սամվել Զաքարյանը:
Սամվել Զաքարյանը նաև նշեց, որ նախկինում պետությունը դեղամիջոցներ արտադրող տեղական ընկերություններին 750 հազար դրամի սուբսիդիա էր հատկացնում, սակայն այս սուբսիդավորումը չեղարկվել է 2 տարի առաջ. «Դրանից հետո, Առողջապահության նախարարության հետ քննարկումներ են անցկացվել: Արդյունքում, մշակվել է նախագիծ, որի համաձայն, դեղերի կրկնակի գրանցման արժեքը 900 հազար դրամից պետք է նվազեցնեին 250 հազար դրամի: Նախագիծը 2,5 տարի դրված է իրավական ակտերի նախագծերի հրապարկման միասնական կայքում:
Վեց ամիս առաջ նորանշանակ նախարարին նամակ ենք ուղարկել,
խոստացել են, որ այդ հարցին շուտափույթ լուծում կտան, բայց դեռևս ոչ մի քայլ չի արվել:
Սա մի խնդիր է, որի մասին անընդհատ խոսում ենք, անընդհատ խոստանում են, բայց ապարդյուն: Պարզապես պետք է քաղաքական կամք դրսևորել
և այդ որոշումն ընդունել, որի
արդյունքում, տեղական արտադրողները մեկ թղթի համար կվճարեն
գոնե
250 հազար դրամ: Տեղական դեղ արտադրողներն այս տարի դեղերի վերագրանցման համար արդեն իսկ վճարել են 50 մլն դրամ:
Մինչդեռ այս գումարներն, կարող էին ծախսել
նոր աշխատատեղերի ստեղծման, նոր դեղերի արտադրության համար: Նախարարին հորդորում եմ, որ իր կառույցում գտնվող փորձագիտական կենտրոնի կոռուպցիոն երևույթներին հետամուտ լինի և պարզի, թե այդ գումարներն ինչի վրա են ծախսում»,- ասաց Սամվել Զաքարյանը:
Սամվել Զաքարյանը անդրադարձավ նաև դեղերին փակցվող դրոշմապիտակներին.
«Նախկին կառավարությունը
2014թ. դրա մասին նախագիծ է ընդունել, պատճառաբանելով, թե դրոշմապիտակների օգտագործումը ստվերի կրճատման համար են դրել: Հայաստանը աշխարհում միակ երկիրն է, որտեղ դեղերին դրոշմապիտակ են փակցնում:
4 տարի է անցել, ՊԵԿ-ից պահանջում ենք, թե ինչքան է կրճատվել ստվերը, ոչ մի տրամաբանական պատասխան չենք ստացել»:
Սամվել Զաքարյանը հավելեց նաև, որ առողջապահության նախարար Արսեն Թորոսյանը խուսափում է միության անդամների հետ հանդիպել, քննարկել ոլորտի խնդիրները, իսկ պաշտոնական նամակում գրված է եղել խիստ զբաղված եմ:
Ամբողջական ասուլիսը Hayacq.com-ի տեսանյութում
