Մենք նման վարվելակերպ չենք ունեցել.չի կարելի այս էյֆորայի շրջանում ընտրություններ կազմակերպել
«Մենք որևէ հայհոյանքի տոն, որևէ նման հռետորաբանություն չունենք և բոլոր քննարկումները տեղափոխում ենք քաղաքական դաշտ, բայց մենք փաստն ենք արձանագրում: Ես, մեծ հարգանք ունենալով Դաշնակցության նկատմամբ, եթե դուք հիշում եք, կոալիցիոն մեր գործընկերները հենց առաջին օրն արդեն իսկ իշխանափոխության ժամանակ առանց լուրջ հետևություններ անելու իշխանափոխության ջատագովներն էին, մաս կազմեցին կառավարությանը: Չգիտեմ՝ ինչ-ինչ պատճառներով հետո ճանապարհի կեսից որոշվեց, որ նրանք պետք է ընդդիմություն դառնան: Հետո չգիտեմ, թե ճանապարհի մյուս կեսին ինչ կորոշեն իրենք, բայց համենայնդեպս նման ձևով ընդդիմություններ չեն ձևավորում: Վեց ամսվա ընթացքում երկու-երեք անգամ մտափոխվել, որ իշխանության հետ են, հետո փոխվեն, որ պետք է լինեն ընդդիմություն»,- այսօր ԱԺ ճեպազրույցների ժամանակ հայտարարեց ՀՀԿ խմբակցության ղեկավար Վահրամ Բաղդասարյանը՝ հակադարձելով ՀՅԴ խմբակցության ղեկավար Արմեն Ռուստամյանի հայտարարությանը, թե ՀՀԿ-ն, որն ասում է, թե միակ ընդդիմությունն է, նախկինների սխալներն է կրկնում:Ըստ նրա՝ հեղափոխության ժամանակ կարելի էր միայն երեք փողոցի հետևել՝ Նալբանդյան, Աբովյան, Ամիրյան, ու տեսնել, թե մտքափոխ ոնց էին կանգնած փողոցի ծայրին, մտածում էին՝ իջնե՞լն է ճիշտ, թե՞ բարձրանալը, միանա՞նք, թե՞ չմիանանք.
«Հենց որ ակտիվանում էր իշխանությունը, զգում էին, որ ինչ-որ բան պետք է փոխվեր, կամաց իջնում էին, հենց որ տեսնում էին՝ նախորդ իշխանության կողմից լինում էր կոշտ հայտարարություն, հետ էին գնում: Իսկ ամսի 23-ին՝ Սերժ Սարգսյանի հրաժարականից հետո, պարզապես տեղ չէին տալիս, թե ով պետք է առաջին շարքում լիներ: Նիկոլի իշխանության ներկայացուցիչները հրում էին՝ դու մեզ պետք չես, էն մեկի վզից քաշում էին՝ արի, դու կարող ա մեզ պետք լինես: Այդպե՞ս էին իշխանություն ու ընդդիմություն ձևավորում, ես չեմ հասկանում: Մենք նման վարվելակերպ չենք ունեցել»:
Բաղդասարյանն ասաց, որ իրենք ընդունում են՝ եթե չլինեին սխալներ ու բացթողումներ, բնականաբար, այս ամենը տեղի չէր ունենա, բայց այդ կերպ էլ քաղաքական դաշտ չի կարելի ձևավորել. «Դա շատ վտանգավոր է՝ նման քաղաքական դաշտ ձևավորելը, իսկ առայժմ ամեն ինչ դրան է անում: Այդ պատճառով ենք մենք ասում՝ չի կարելի այս էյֆորայի շրջանում ընտրություններ կազմակերպել: Պետք է թողնեին՝ կառավարությունը մի տարի աշխատեր, հանրությունը գնահատական տար»:
