Մոսկվայում քթի վիրահատությունից հետո հայուհին կոմայի մեջ է ընկել․ վիճակը ծայրահեղ ծանր է
Մոսկվայի մասնավոր կլինիկաներից մեկում տեղի ունեցած վիրահատությունից հետո հայազգի 25-ամյա Կարոլինա Սարգսյանը հայտնվել է կոմայում։ Ռուսական լրատվամիջոցները հայտնում են, որ աղջիկը ցանկացել է քիթը ձեւափոխել, սակայն վիրահատությունից հետո կոմայի մեջ է հայտնվել։Աղջկա մայրը պատմել է, որ վիրահատությունը լավ է անցել, սակայն դրանից հետո Կարոլինան սկսել է իրեն վատ զգալ։ Բուժքույրը նրան քնաբեր է տվել, ինչից հետո աղջիկը սկսել է զառանցել, ապա հայտնվել կոմայի մեջ։
Աղջկա մայրը պնդում է, որ նրան չափազանց շատ դեղամիջոցներ են տվել, ինչի հետեւանքով էլ աղջիկը նման վիճակում է հայտնվել։
Հիվանդանոցի անձնակազմը վստահեցնում է, որ Կարոլինայի մոտ ալերգիկ ռեակցիա է սկսվել դեղամիջոցներից մեկից։ Սակայն նույն հիվանդանոցի նախկին աշխատակիցներից մեկը հայտարարել է, որ մեղավորը հիվանդանոցի անեսթեզիոլոգն է, ով առանց ստուգելու՝ տարբեր դեղամիջոցներ է ներարկել Կարոլինային։
Ի դեպ, այս հիվանդանոցում սա առաջին նմանատիպ դեպքը չէ։ Հիվանդանոցի նախկին աշխատակիցը պնդում է, որ նույն այդ անեսթեզիոլոգի պատճառով հիվանդանոցում երեք կին է մահացել։
ՌԴ քննչական կոմիտեն դեպքի առթիվ ուսումնասիրություն է սկսել։
Նշենք նաեւ, որ բժիշկները ներկայումս պայքարում են աղջկա կյանքը փրկելու համար։
