«Շերեմետևո»-ում մահացած Ալբերտ Եփրեմյանը դեպքից ժամեր առաջ հարվածել է ՌԴ վաստակավոր արտիստին
«Շերեմետևո» օդանավակայանում դժբախտ պատահարի հետևանքով մահացած Ալբերտ Եփրեմյանը դեպքից ժամեր առաջ Մադրիդ-Մոսկվա չվերթի ինքնաթիռում հարվածներ է հասցրել ռուս հայտնի բալետմայստեր, ՌԴ վաստակավոր արտիստ Սերգեյ Ռադչենկոյին:«Նա մի քանի անգամ հարվածեց մի տղամարդու, այնուհետև միջամտեցին բորտուղեկցորդուհիները: Նրան ստիպեցին, որ գա և իր տեղը նստի: Նա նստեց և սկսեց ինձ նայել: Ես ուշադրություն չդարձրի: Հանկարծ հարված զգացի ծնոտիս: Ես չպատասխանեցի, ձեռնամարտի մեջ չմտա»,- պատմել է Ռադչենկոն:
Նա նաև նշել է, որ միջադեպից հետո նրան անձնակազմից մի տղամարդ ու բորտուղեկցորդուհիներն են մոտեցել և ստիպել , որ մնա իր տեղում մինչև թռիչքի ավարտը:
Ավելի վաղ տեղեկացրել էինք, որ Մոսկվայի «Շերեմետևո» օդանավակայանում Հայաստանի քաղաքացի է մահացել: 25-ամյա Ալբերտ Եփրեմյանն արտաքսվել էր Իսպանիայից և Մոսկվայի տարանցումով գալիս էր Հայաստան: Օդանավում մինչ այդ քաշքշոց էր սկսվել, որին մասնակից է եղել նաև Եփրեմյանը:
Իրավապահները նրան ինքնաթիռից իջեցրել են և տեղափոխել հերթապահ մաս: Այնտեղ արձանագրություն կազմելուց հետո ոստիկանները փորձել են նրան տեղափոխել Մոսկվա-Երևան չվերթի ուղևորներին դեպի ինքնաթիռ տեղափոխող ավտոբուս, սակայն նրան հաջողվել է փախչել: Որոշ ժամանակ անց նրա մարմինը գտել են թռիչքուղու վրա: Նախնական քննությունը ցույց է տվել, որ թռիչքի պահին նրան հարվածել է ինքնաթիռի անիվը:
