Հիբրիդային պատերազմ Հայաստանի դեմ և մեր թշնամիները մեզ վրա աշխատում են
Մենք հիմա հիբրիդային պատերազմի ժամանակաշրջանում ենք գտնվում, որտեղ ցանկացածը փորձում է տեղեկատվությունը որպես զենք օգտագործել՝ սերմանելով Հայաստանի ներսում այնպիսի հոգեվիճակ, որ թվա, թե բոլոր կողմերից ճնշումներ են ու մեր իշխանություններն էլ փորձում են զիջումների գնալ, լրագրողների հետ հանդիպմանն ասաց Մարդկային զարգացման կենտրոնի նախագահ Թևան Պողոսյանը՝ անդրադառնալով Արցախի հարցի շուրջ վերջին շրջանում հնչած հայտարարություններին:Խոսելով ՌԴ ԱԳ նախարարի Սերգեյ Լավրովի արած հայտարարության մասին, թե Իլհամ Ալիևը պատրաստակամ է վերսկսել բանակցությունները ղարաբաղյան հարցի շուրջ և Ալիևի այն հայտարարությանը, որ 2019 թվականը բեկումնային է լինելու ԼՂ շուրջ հայ-ադրբեջանական հակամարտությանը կարգավորման գործընթացում, Պողոսյանն ասաց.
«Աշխարհով մեկ բոլորը հույսեր են հայտնում: Բնական ստանդարդ պրոցեդուրա է, որ նորը գալով նոր հույսեր են հայտնում: Դա իրենց երկրների համար է արվում, մենք մեր շահերով ենք առաջնորդվելու և կարող ենք հարցնել՝ ի՞նչն է փոխվելու, որ նոր բեկում պիտի առաջանա: Ինչ է Ալիևն ասել է, որ Երևանը էլ չի պատրաստվում հետ վերցնի հա՞, էլ զենքեր չի գնելու, գործողություններ չի կատարելու… Մենք էլ ենք չէ՞ ստանում տեղեկություններ ու շատ լավ գիտենք, թե ինչ է կատարվում: Մենք մեր տեղեկություններով պիտի առանորդվենք ու հասկանանք, որ սա այն գործողությունն է, որը կոչվում է հիբրիդային պատերազմ և մեր թշնամիները մեզ վրա աշխատում են»:
ՌԴ ԱԳՆ Սերգեյ Լավրովը Բաքվում հայտարարել էր, որ Ադրբեջանի նախագահ Իլհամ Ալիևը պատրաստակամ է վերսկսել բանակցությունները ղարաբաղյան հարցի շուրջ և կառուցողական լուծումներ փնտրել: Ալիևը Թվիթերի իր էջում գրել էր, որ 2019 թվականը նոր ազդակ կհաղորդի Լեռնային Ղարաբաղի շուրջ հայ-ադրբեջանական հակամարտությանը կարգավորման գործընթացին:
