Ընձառյուծը երեքամյա երեխային մոր աչքի առաջ հափշտակել և տարել է անտառ
Հնդկաստանում ընձառյուծը փոքրիկ երեխային քարշ է տվել անտառ և գլխատել, հաղորդում է Daily Mail-ը:Միջադեպը տեղի է ունեցել երկրի հյուսիսի Ջամու և Քաշմիրի նահանգում: Կենդանին մտել է տներից մեկի խոհանոց և տարել է երեքամյա Վասիմ Աքրամին: Այս ամենը տեղի է ունեցել երեխայի մոր աչքի առաջ, որը չի կարողացել որևէ բան անել: Որոշ ժամանակ անց անտառում հայտնաբերվել է գլխատված երեխայի մարմինը:
Տեղացիները կարծում են, որ սա գիշատչի առաջին զոհը չէ. վերջին երկու ամիսների ընթացքում նույն տարածքում ընձառյուծը ևս երկու մարդ է սպանել: Զոհերից մեկը 8-ամյա երեխա է: Մարդասպան կենդանուն որսալու և վնասազերծելու համար մի ամբողջ ջոկատ է հատկացվել: Ջոկատի անդամներից մեկը պնդել է, որ տեսել է կենդանուն, սակայն դեռ չի կարողացել որսալ:
Դեկտեմբերի կեսերին հաղորդվել է ընձառյուծի զոհ դարձած վանականի մասին, որն անտառ էր գնացել մեդիտացիայի նպատակով և գիշատչի զոհ դարձել:
