Ամեն բան տեղը տեղին արվել է ձմեռային զորակոչի համար.զինծառայողները կարող են իրենց հետ հեռախոս վերցնել՝ միայն մի պայմանով․
Երեկվանից առաջին խումբը ժամանել է կենտրոնական հավաքակայան՝ զորակոչվելու համար։ Այս մասին այսօր՝ ձմեռային զորակոչի մեկնարկին լրագրողների հետ զրույցում ասաց ՀՀ զինվորական կոմիսար, գեներալ-մայոր Հենրիկ Մուրադյանը:«Վիճակահանություն կլինի ու 17:00-ից հետո զինծառայողներին կուղեկցեն զորամասեր: Հիմնական աշխատանքները իրականացվել են դիմավորման կետում, մանդատային հանձնաժողովում եւ բժշկական կետում: Այս զորակոչի ընթացքում կա մեկ առանձնահատկություն՝ պաշտպանության նախարարի հրամանով կանոնակարգված է, որ ժամկետային զինծառայողներից ցանկացողները իրենց հետ են վերցնում հեռախոսները: Կա մեկ պայման․ կան սահմանափակումներ՝ բջջային հեռախոսներով նկարահանումներ չիրականացվեն»,- մանրամասնեց Հ. Մուրադյանը:
Զինկոմիսարն ասաց, որ առողջական լուրջ խնդիրներ ունեցողներն անպայնման ստուգվում են՝ հասկանալու համար պիտանի՞ են զինվորական ծառայության, թե ոչ: Նա նշեց, որ անցյալ տարի 400-ից ավել երիտասարդ առողջությունը վերականգնելուց հետո զորակոչվել է:
Նշենք, որ ձմեռային զորակոչի ընթացքում` այսօրվանից մինչեւ զորակոչի ավարտը, ՀՀ ՊՆ կենտրոնական հավաքակայանում պարբերաբար անցկացվելու են բրիֆինգներ ՀՀ ՊՆ, ԶՈւ եւ ԶՈւ ԳՇ բարձրաստիճան պաշտոնյաների մասնակցությամբ:
Ավելի վաղ Կառավարությունը հաստատել էր 2019 թվականի ձմեռային զորակոչ հայտարարելու եւ զորացրում կատարելու մասին որոշումը: Այդ որոշման համաձայն՝ մինչեւ 2019 թվականի փետրվարի մեկը օրենքով սահմանված ժամկետում շարքային կազմի պարտադիր զինվորական կամ այլընտրանքային զինվորական ծառայություն անցած զինծառայողները կզորացրվեն ԶՈՒ-ի շարքերից։
