Ադրբեջանը հիմա պատրաստում է պլան Բ-ն
Ադրբեջանագետ, «Ադրբեջանահայերի ասամբլեա» փախստականների ՀԿ նախագահ Գրիգորի Այվազյանը ճիշտ է համարում ՀՀ իշխանությունների, մասնավորապես՝ վարչապետ Նիկոլ Փաշինյանի պնդումը, որ Արցախն է բանակցային կողմը, իսկ Հայաստանն ընդամենը միջնորդ է: Ըստ ադրբեջանագետի՝ Ադրբեջանը հիմա պատրաստում է պլան Բ-ն: «Ուզում էին գործի դնել, այսպես կոչված, «Ղարաբաղի ադրբեջանական համայնքը», և եթե հարցը հասնի նրան, որ Ղարաբաղը պետք է վերադառնա բանակցային սեղանի շուրջ, ուզում են նստեցնել այդ հասարակական կազմակերպության դրածո խամաճիկին»,-ասաց նա:
Միաժամանակ, ըստ նրա՝ հայկական կողմն էլ ունի արգումենտ. «Եթե Ադրբեջանը կպնդի, որ համայնքների միջև է բանակցությունը, ապա Իլհամ Ալիևը կարող է նստել վտարանդի ադրբեջանահայ ղեկավարության հետ ու բանակցել Ադրբեջանի ապագա ճակատագրի, կառուցվածքի վերաբերյալ, այսինքն՝ Ղարաբաղը մի կողմ, Ղարաբաղը Ադրբեջանի մաս չէ»,-ասաց նա:
