Կայծակը հարվածել է Հռոմից Մոսկվա թռչող ինքնաթիռին
Ռուսական ավիաընկերություններից մեկին պատկանող և Հռոմ-Մոսկվա ավիաչվերթն իրականացնող Airbus A320 ինքնաթիռը կայծակի հարված է ստացել, գրում է lenta.ru-ն՝ հղում անելով Մոսկվայի «Շերեմետևո» օդանավակայանի մամուլի ծառայությանը:Բարեբախտաբար, ինքնաթիռը կարողացել է շարունակել թռիչքը: Արտակարգ վայրէջքի կարիք չի առաջացել:
Ավելի ուշ օդանավը բարեհաջող վայրէջք է կատարել «Շերեմետևո»-ում: Աղբյուրը նշում է, որ միջադեպի հետևանքով ոչ ոք չի տուժել: Հայտնի է, որ ինքնաթիռում գտնվող ուղևորների մեծ մասը ՌԴ քաղաքացիներ են եղել:
Վայրէջքից հետո տեխնիկական սպասարկման թիմի աշխատակիցները զննել են ինքնաթիռն ու հայտնաբերել կայծակի հարվածի հետքերը: Օդանավը մի որոշ ժամանակ թռիչքներ չի իրականացնի:
