Մի շարք ոլորտներում նշանակալի ներդրում ունեցած անձինք կազատվեն պարտադիր զինծառայությունից
Կառավարությունը փետրվարի 15-ի նիստում որոշեց բացառիկ դեպքերում կրթության, գիտության, մշակույթի, արվեստի եւ սպորտի բնագավառներում նշանակալի ներդրում ունեցած անձանց ազատել պարտադիր զինվորական ծառայությունից։ Ըստ նախագծի հիմնավորման՝ բացառիկ դեպքերը հետեւյալներն են.Մշակույթի եւ արվեստի բնագավառներում գործունեության համար կառավարության կողմից նախկինում տարկետում տրված լինելու եւ այդ բնագավառներում քաղաքացու կողմից կառավարության 2018 թվականի ապրիլի 12-ի N 457-Ն որոշման համաձայն նշանակալի նվաճումներ ունենալու հանգամանքները:
Սպորտի բնագավառում գործունեության համար կառավարության կողմից նախկինում տարկետում տրված լինելու եւ այդ բնագավառում քաղաքացու կողմից կառավարության 2018 թվականի ապրիլի 12-ի N 450-Ն որոշման համաձայն նշանակալի նվաճումներ ունենալու հանգամանքները:
Գիտական աստիճան ունեցող քաղաքացուն կրթության եւ գիտության բնագավառներում գործունեության համար կառավարության կողմից նախկինում տարկետում տրված լինելու եւ քաղաքացու կողմից օրենքով սահմանված գիտական եւ գիտատեխնիկական գործունեությամբ զբաղվելու հանգամանքները:
Նշվում է նաեւ, որ քաղաքացին պարտադիր զինվորական ծառայությունից ազատվում է կառավարության որոշմամբ` կրթության եւ գիտության, մշակույթի, սպորտի եւ երիտասարդության հարցերի բնագավառներում պետական լիազոր մարմնի ներկայացմամբ:
