Մոսկվայում դաժանաբար սպանվել են մայր ու որդի, սպանության համար կասկածվում է ընտանիքի հայրը
Ռուսաստանի մայրաքաղաք Մոսկվայում տղամարդը կասկածվում է կնոջն ու որդուն դաժանաբար սպանելու համար, դեպքից հետո նա փորձել է ինքնասպանություն գործել, այս մասին տեղեկացնում է ՌԴ քննչական կոմիտեի մայրաքաղաքային վարչության կայքը:
Նշվում է, որ միջադեպը տեղի է ունեցել ընտանիքի բնակարանում՝ Մոսկվայի հյուսիս-արևելյան հատվածում: Վաղ առավոտյան իրավապահները տանը հայտնաբերել են դանակի և պտուտակահանի բազմաթիվ հարվածների հետքերով մոր և որդու մարմինները: Սպանության համար կասկածվում է ընտանիքի հայրը, որը միջադեպից հետո փորձել է ինքնասպան լինել:
Այժմ տղամարդը գտնվում է բժիշկների հսկողության տակ, նրան ցուցաբերվում է համապատասխան օգնություն: Քննիչներն արդեն հարուցել են քրեական գործ՝ երկու և ավելի անձանց սպանության մասին հոդվածով:
Նշվում է, որ ընտանիքն Ուկրաինայից Մոսկվա էր տեղափոխվել 5 տարի առաջ և բնակվում էր կնոջ տատիկի բնակարանում: Ծեր կինը պատմել է, որ վերջին շրջանում ամուսինների միջև լուրջ կոնֆլիկտներ, կարծես, չեն եղել:
