Բուհերի ուսանողներն ուսման վարձը կվճարեն ամեն ամիս. ԱԺ-ն ընդունեց «Կրթության մասին» օրենքում փոփոխությունների նախագիծը
ԱԺ-ն առաջին ընթերցմամբ՝ ձայների 111 կողմ, 2 դեմ հարաբերակցությամբ, ընդունեց «Կրթության մասին» Հայաստանի Հանրապետության օրենքում փոփոխություններ կատարելու մասին օրենքի նախագիծը։ Այն ԲՀԿ խմբակցության պատգամավոր Տիգրան Ուրիխանյանի հեղինակած օրինագիծն էր, ըստ որի բուհերի ուսանողները հնարավորություն կստանան ուսման վարձերը վճարել ոչ թե կիսամյակային կտրվածքով, այլ՝ ամսեամիս։«Նախագծի ընդունումը հնարավորություն կտա որոշակիորեն մեղմել վճարովի համակարգում սովորող ուսանողների ուսման վարձի վճարման հետ կապված ֆինանսական դժվարությունները»,- իր ելույթում ասաց Տ. Ուրիխանյանը:
Երկրորդ ընթերցմամբ և ամբողջությամբ ընդունվեց նաև «Լուսավոր Հայաստան» խմբակցության ներկայացրած օրինագիծը, որով երկարացվում է զինծառայությունից խուսափած, 27 տարին լրացած անձանց ներելու, օրենքով սահմանված գումարը վճարելու և հայրենիք վերադառնալու ժամկետը։
ԱԺ նախագահ Արարատ Միրզոյանը տեղեկացրեց, որ այսօր ժամը 16։30-ին տեղի կունենա պատգամավորների և կառավարության անդամների հարցուպատասխանը։
