Մի հատ բորդյուր չեն դրել, մարդկանց ստեղծածն ուզում են քանդել.. Լարված իրավիճակ՝ Օպերայի մոտ
Օպերայի մոտ իրավիճակը շարունակում է լարված մնալ: Երևանի քաղաքապետարանը, որն այսօր սկսել է Օպերայի հարակից տարածքի սրճարանների ապամոնտաժումը, հանդիպել է սրճարանների աշխատակիցների դիմադրությանը:«Ջազզվե» սրճարանի համահիմնադիրներից Արմեն Պետրոսյանը լրագրողների հետ զրույցում հայտարարեց, որ իրենց հետ ևս պայմանագիրը խզվում է, իրենց սրճարանն էլ պետք է ապամոնտաժվի:
Պետրոսյանը նշեց, որ բացասական է վերաբերվում սկսված գործընթացին: Նրա խոսքերով, Երևանում կան մեծ թվով տարածքներ, որտեղ հնարավոր է կանաչ գոտին վերականգնել, իսկ քաղաքապետարանը սկսել է պատրաստ օբյեկտներից. «Պայմանագրում կետ կա, որի հիման վրա ցանկանում են խզել, բայց հարցն այն է, որ մեր քաղաքապետը տղամարդկություն չունեցավ հանդիպել սրճարանների սեփականատերերի հետ, հասկանալ խնդիրները: Մենք քաղաքապետարանի նամակին հրավեր պատասխան ենք գրել, որի պատասխանը դեռ չենք ստացել: Մենք նշել ենք, որ ներդրումներ ենք արել, պետք է հասկանայինք, թե ինչ ենք անելու: Բայց արձագանք չեղավ:
Եթե քաղաքապետարանում ինչ-որ մեկին թվում է, որ ինձանից շատ են սիրում Երևանը, սխալվում են: Ես 2000 թվից բիզնեսով եմ զբաղվում ու ներդրումներ արել եմ Հայաստանում, ոչ թե ոմանց նման՝ եվրոպաներում, մասնավորապես՝ Պրահայում (ակնարկում է Հայկ Մարությանին): Ես դեմ չեմ, եթե կանաչապատ գոտիները վերականգնում են, թող հանդիպեն մեզ հետ, զգուշացնեն, որ 10 տարվա պայմանագիրը 3-4 տարի կտևի, մենք կհասկանանք, մեր բիզնեսն այդ ակնկալիքով կանենք: Բայց մեզ չեն տեսել, որևէ քննարկում չի եղել: Մեզ միայն ասել են, որ պետք է 1 ամսում ազատենք տարածքը և այն, որ կադաստրը միակողմանի կասեցրել է պայմանագիրը»:
Պետրոսյանը նշեց, որ ֆինանսական կորուստը շատ մեծ է լինելու, քանի որ 2 տարի առաջ տարածքն ամբողջությամբ վերականգնվել է. «Ես չեմ կարծում, թե սրանից հետո կարելի է ներդրում անել: Հնարավոր է, որ մի բան սարքես, մի օր էլ քաղաքապետն արթնանա ու ասի, որ դա էլ պետք է քանդվի: Միայն տարբեր հայտարարություններ են անում, մի հատ բորդյուր Հայաստանում չեն դրել, մարդկանց ստեղծածն ուզում են քանդել: Ինչպես հասկանում եմ, այնտեղ պրոֆեսիոնալներ չկան: Թող աշխատատղեր ստեղծեն, իմ իմանալով նրանք հենց դրա համար էին եկել, բայց միայն պրոբլեմներ են ստեղծում»:
