Արհեստական «կերակրող կուրծք»՝ հայրերի համար
Ճապոնական Dentsu ընկերությունը Տեխասի նահանգի Օստին քաղաքում կայացած SXSW փառատոնին հայրերի համար նախատեսված արհեստական «կուրծք» է ներկայացրել: Հարմարանքը, որն արտաքնապես կնոջ կուրծք է հիշեցնում, կոչվում է կերակրող հոր օգնական, հաղորդում է «Ֆակտին»:«Ճապոնացի երեխաները աշխարհում ամենաքիչն են քնում: Մենք ցանկանում ենք լուծել խնդիրը և օգնել հայրերին առավել ակտիվորեն մասնակցել իրենց երեխաների կյանքին»,- ասել է ընկերության ներկայացուցիչը:
Արհեստական կուրծքը հագեցած է կաթի կամ կաթնային խառնուրդի պահոցով, ծծակով և հատուկ սարքով, որը վերահսկում է երեխայի կերակրման գործընթացը և ինֆորմացիան փոխանցում ծնողի սմարթֆոնին:
Նշվում է, որ Dentsu-ն ապրանքը դեռ չի հանել շուկա, բայց պատրաստվում է դա անել: Միևնույն ժամանակ, լրագրողները հետաքրքրվում են, թե այն գնորդներին հիշեցնելու՞ է, որ տվյալ հարմարանքը դեռևս չի կարող փոխարինել բնական կրծքով կերակրելուն:
