Նեուժելի Ազգային ժողովն էնքան խեղճ ա, որ իր տված 40 հազարի վրա չի կարողանում 15 հազար ավելացնել
Այսօր Ազգային ժողովում աշխատող մաքրուհիները կրկին բողոքում էին իրենց աշխատավարձերի կրճատման համար: ԱԺ նախագահի տեղակալ Վահե Էնֆիաջյանի հետ զրույցի ժամանակ նրանք նշեցին. «Ես իմ հաշվապահական դիպլոմը դրել եմ, եկել եմ 22 տարի աշխատում եմ էս հիմնարկում: Ինձ հաճելի չէ, որ գամ առավոտը ինչ-որ մեկի ոտերի տակը մաքրեմ, բայց եթե մաքրում եմ, կարելի ա էս խավի նկատմամբ հարգանք ցուցաբերել: Նեուժելի Ազգային ժողովն էնքան խեղճ ա, որ իր տված 40 հազարի վրա չի կարողանում 15 հազար ավելացնել: Սոցփաթեթը կտրում են, ոչ մի պարգևավճար չենք ստանալու, դրա փոխարեն մի փոքր փոխհատուցում հնարավոր չէ՞ աշխատողին տալ»:Ի պատասխան՝ Էնֆիաջյանը նշեց. «Ես այսօր էլի ձեզ խոստանում եմ, էլի կներկայացնեմ կա՛մ աշխատակազմի ղեկավարին, կա՛մ ԱԺ նախագահին, կտեղեկանամ՝ ձեր հարցի հետ կապված ինչ որոշում ունեն»:
Մաքրուհիներն ասացին, որ իրենց չեն տեղեկացրել կրճատումների մասին. «Մեր ղեկավարությունը մեզ ոչ մի հարցով չի տեղեկացրել, մի հատ ժողով չեն արել, ասել՝ ժողովուրդ, ձեր աշխատավարձը կարող է կրճատվել, որ մենք էլ հասկանայինք՝ ինչ անել»,- ասում են նրանք:
Վահե Էնֆիաջյանը խոստացավ ԱԺ նախագահին և աշխատակազմի ղեկավարին ներկայացնել խնդիրը և գտնել լուծման տարբերակներ:
Հիշեցնենք, որ մարտի 22-ից ԱԺ-ում աշխատող մաքրուհիները բողոքում են իրենց աշխատավարձերի կրճատման համար: Ավելի վաղ ԱԺ-ն հայտարարություն էր տարածել այս խնդրի վերաբերյալ:
