Վստահ չենք,որ օբյեկտիվ քննություն կտարվի Մարտի 1-ի գործով,դատական համակարգում վիրահատություններ անելու ժամանակն է
Չեմ կարող երաշխավորել, որ դատական համակրագը չի ենթարկվում ստվերային և ապօրինի ազդեցությունների: Այս մասին այսօր իր ելույթում ասաց Նիկոլ Փաշինյանը:Հիշեցնենք, որ վարչապետը երեկ հայտարարել է «Հանուն արդար դատարանի» բողոքի ակցիայի իրականացման մասին, որով կոչ էր արել բոլորին փակել հանրապետության բոլոր դատարանների մուտքերն ու ելքերը:
«Որքանով կարող ենք վստահ լինել, որ այսօրվա դատական համակարգը ի վիճակի է օբյեկտիվ քննություն տանել հենց մեկը Մարտի 1-ի գործով այն պարագայում, երբ գործադիր իշխանությունների կողմից թույլ տրված տասնյակ ապօրինություներ կյանքի են կոչվել հենց դատական գործող համակարգի միջոցով: Դա արդեն երևում է ՄԻԵԴ որոշումներով, և այդ որոշումները վերաբերում են նաև, այսպես կոչված, իրացման գոտիների բնակիչներին և այլ խնդիրներին»,- ասաց Փաշինյանը:
Նա հայտարարեց, որ թավշյա հեղափոխությունից հետո հույս է ունեցել, որ դատավորները, հասկանալով, որ իրենց նախորդ դատական գործունեությունը և արժեքային համակարգը անհամապատասխան են նոր Հայաստանի ձգտումներին, կհրաժարվեն դատավորի պաշտոնից:
«Նման բան տեղի չունեցավ, և դատական համակարգի՝ ժողովրդական վսատհության արժանանալու ընթացիկ հնարավորություը համարում եմ այլևս սպառված: Մենք չենք կարող հանդուժել այս իրավիճակը»,- հայտարարեց վարչապետը:
Նա հայտարարեց, որ դատական համակարգում վիրահատություններ անելու ժամանակն է:
Վարչապետի խոսքով այդ գործընթացը պետք է արտահայտվի հետևյալում.
«Առաջին՝ Հայաստանում գործող բոլոր դատավորներն առանց բացառության պետք է ենթարկվեն այսպես ասած վեթինգի, այսինքն հանրությունը պետք է ամբողջական տեղեկատվություն ունենա դատավորի ունեցած քաղաքական կապերի, ծագումնաբանության, գույքային վիճակի, ծավալած գործունեության, անհատական և պրոֆեսիոնալ հատկանիշներին։
Երկրորդ. Մարդու Իրավունքների Եվրոպական դատարանի որոշումներով հաստատված քաղաքացիների իրավունքների կոպիտ խախտումներով դատավճիռների հեղինակ բոլոր դատավորները պետք է հրաժարական տան, հեռանան կամ հեռացվեն պաշտոններից։
Երրորդ. Բոլոր դատավորները, ովքեր իրենց ներսում գիտեն, որ չեն կարող լինել անաչառ և օրինավոր դատավորներ, պետք է հրաժարական տան, այդպիսով կարևոր ծառայություն մատուցելով Հայաստանի Հանրապետությանը ու նրա ժողովրդին։
Չորրորդ. Հիմա արդեն անցումային արդարադատության մեխանիզմների ներդնումը կենսական անհրաժեշտություն է Հայաստանի Հանրապետության համար և մենք պետք է մեկ-երկու ամսվա ընթացքում ամփոփենք վերջին 7-8 ամիսներին այս ուղղությամբ կատարած աշխատանքը։
Հինգերորդ. Ազգային Ժողովում պետք է տեղի ունենա օրենսդրական համապատասխան աշխատանք, մեր երկրի համար կենսական այս օրակարգը կյանքի կոչելու և Հայաստանում իրապես երաշխավորված անկախ դատական համակարգ ունենալու համար»։
Վարչապետը նաև ընդգծեց, որ եթե այս ամենի համար անհրաժեշտ լինի իրականացնել սահմանադրական փոփոխություններ, իրենք պետք է գնան նաև այդ քայլին, եթե պետք լինի դա անել համաժողովրդական հանրաքվեով, իրենք պետք է գնան նաև նման լուծուների։
