Նախկինում չենք տեսել , որ ԱԱԾ տնօրենն այդքան սերտ համագործակցի քրեական հեղինակությունների հետ՝Վստրեչի Ապեր, Թոխմախի Բաբո...
«Նախկինում մենք չենք տեսել դեպքեր, որ Ազգային անվտանգության ծառայությունը կամ ծառայության տնօրենն այդքան սերտ համագործակցության մեջ լինեն քրեական հեղինակությունների հետ: Այո, նախկինում համագործակցություն եղել է, բայց ոչ թե տնօրենի, այլ ավելի ցածր ռանգի չինովնիկների մակարդակով»,- այսօր «Ազգային անվտանգության ծառայության դերն ու նշանակությունը. ի նպաստ ո՞ւմ է օգտագործվում վարչական ռեսուրսը» թեմայով քննարկման ժամանակ կարծիք է հայտնել «Իրազեկ քաղաքացիների միավորման» ծրագրերի համակարգող Դանիել Իոաննիսյանը՝ նշելով, որ այդ մարդկանցից են Վստրեչի Ապերը, Թոխմախի Բաբոն, Վովայի Արշակը և այլոք: «Այսինքն այդ մարդիկ հիմա իրենց ավելի ազատ են զգում, քան նախկինում: Ընդ որում, այդ մարդիկ Երևան քաղաքի Էրեբունի թաղամասից են, իսկ Արթուր Վանեցյանը հենց Էրեբունու ԱԱԾ բաժնում է աշխատել և, ըստ շրջանառվող լուրերի, դեռ այն ժամանակներից բավականին մոտիկ հարաբերություններ ուներ նրանց հետ, որը պահպանվել է»,- ասել է Իոաննիսյանը:«Մենք ունենք երևույթներ, երբ որ ԱԱԾ-ն փորձում է տարբեր դաշտերում ազդեցություն գործել և այդ պարագայում, պարզապես, անհասկանալի է այդ պրոցեսների և Հայաստանում ակնհայտ երևացող ժողովրդավարեցման կապը»:
Դանիել Իոաննիսյանը նշել է, որ Ազգային անվտանգության ծառայության ղեկավար պետք է լինի մարդ, որը հասարակության կողմից, այդ թվում իրավապաշտպան հասարակության կողմից, վստահություն է վայելում: «Բայց օր առաջ պետք է ԱԱԾ լիազորությունները փոխվեն և դրանք բերվեն ժողովրդական հասարակության տրամաբանության սահմաններում տեղավորվող լիազորությունների մեջ: Բացի այդ, պետք է Ազգային անվտանգության ծառայությունն զբաղվի հետախուզությամբ և հակահետախուզությամբ՝ մնալով փակ կառույց»,- կարծիք է հայտնել բանախոսը:
