Նիկոլ Փաշինյանը զգուշացրեց բոլորին
Բալանսավորված քաղաքականության արդյունքում մենք այս տարվա առաջին եռամսյակի արդյունքում ունենք 7,1 համախառն ներքին արդյունքի աճի ցուցանիշ: Սա ոչ թե տնտեսական ակտիվության ցուցանիշն է, այլ ամփոփված համախառն ներքին արդյունքի ցուցանիշը: Խորհրդարանում ՀՀ ԱԺ մշտական հանձնաժողովներում «2018 թ. պետական բյուջեի կատարման մասին» տարեկան հաշվետվության նախնական քննարկումների ժամանակ հայտարարեց ՀՀ վարչապետ Նիկոլ Փաշինյանը:«Ապրիլ ամսվա տվյալներով տնտեսական ակտիվության ցուցանիշը կազմել է 9,2 տոկոս: Սա համատեղ աշխատանքի արդյունք է, սա կառավարություն-խորհրդարան համագործակցության արդյունքն է: Սա նաև ընդդիմադիր գործընկերների հետ համագործակցության արդյունքն է»,-ասաց վարչապետը՝ նշելով, որ քննարկումները երբեմն սուր են լինում, սակայն առաջընթացի էներգիան հենց այդ քննարկումների, շփումների արդյունք է:
Վարչապետ Փաշինյանը շնորհակալություն հայտնեց խորհրդարանի բոլոր գործընկերներին համատեղ աշխատանքի համար․ «Շատ կարևոր է արձանագրել, որ մենք հավատարիմ ենք արժեքներին, որոնք հռչակել ենք ոչ բռնի, թավշյա, ժողովրդավարական հեղափոխության ժամանակ: Հայաստանում հաղթել է սիրո և համերաշխության հեղափոխությունը, մեր կառավարության համար եղել է և մնում է խնդիր այդ հեղափոխության արժեքների ներդնումը ՀՀ-ում որպես հանրային հարաբերությունների մշտական գործող համակարգ և արժեքային համակարգ: Մեզ համար մեծագույն խնդիրներց մեկը եղել ու մնում է բռնությունից զերծ հանրության ձևավորումը: Հայաստանում հենց այդպիսի միջավայր է: Հայաստանը բռնությունից զերծ երկիր է: Բռնության քարոզը, որը տեղ ունի Հայաստանում, իմ գնահատմամբ, լուսանցքային, ետցնցումային երևույթներ են: Բռնություն քարոզող ուժերն ու անձինք, անկախ նրանից իշխանության համակիրներ են, թե ընդդիմության, դուրս են մղվելու ՀՀ հանրային և քաղաքական կյանքից»,-ասաց Փաշինյանը՝ հավելելով, որ որոշ դեպքում կարող են նաև գործել իրավապահ մարմինները:
Վարչապետ Փաշինյանը խստորեն դատապարտեց բռնության որևէ դրսևորում՝ անկախ նրանից, թե ում համակիրներն են նման վարքով հանդես եկողները. «Բռնության և ատելության որևէ դրսևորում Հայաստանում տեղ ունենալ չի կարող: Հայաստանում այդ առումով կա հանրային կոնսենսուս, ինչը պետք է արտահայտվի նաև պետական մարմինների աշխատանքով»:
Անդրադառնալով պետական բյուջեի կատարման հաշվետվությանը՝ վարչապետն ասաց, որ բյուջեի կատարման գործընթացում պաշտոնյաների կաստայական բաժանում է եղել, եղել են պաշտոնյաներ, ովքեր հարկ չեն համարել ներկայանալ պետական բյուջեի կատարման մասին հաշվետվությանը․ «Այս տարի այդպես չի լինելու, բոլոր մարմինները բյուջեի կատարմանը կներկայան մարմինների ղեկավարների առաջին դեմքերով»։
