Օսիպյանը՝ ոստիկանության թվաքանակի և Մարտի 1-ի գործով ձերբակալված ոստիկանի մասին
Ոստիկանության թվաքանակը գաղտնի է պահվում, քանի որ այն հավասարեցված է Զինված ուժերին: Խորհրդարանում հայտարարեց ոստիկանապետ Վալերիյ Օսիպյանը:Ոստիկանապետը նշեց, որ այսօր հասարակական կարգը պահպանող ոստիկանների թիվը հասնում է 10 հազարի:
Նա համաձայն չէ այն մտքի հետ, որ Հայաստանում ոստիկանների թիվը մեծ է բնակչության թվի հետ համեմատած: Ոստիկանապետի խոսքերով, պետություններ կան, որտեղ բնակչության թվի հետ համեմատած ոստիկանների թիվն ավելի մեծ է՝ Իսպանիա, Իտալիա, Սերբիա:
Օսիպյանը նշեց, որ այսօր 100 հազար մարդուն ընկնում է 421 ծառայող: Դա միջին թիվն է, տեղեր կան, որտեղ թիվն ավելի փոքր է: Պետություններ կան, որ այդ թիվը կազմում է 500, 800:
ՀՀ ոստիկանապետ Վալերի Օսիպյանը, անդրադառնալով ոստիկանության զորքերի հրամանատարի նախկին տեղակալ Գեղամ Պետրոսյանի ձերբակալությանը «Մարտի 1»-ի գործով, լրագրողների հետ զրույցի ժամանակ ասաց․ «Ճիշտն ասած, այդ անձը, որ ձերբակալվել է, ինձ մոտ դրական տպավորություն ուներ։ Իր գործառույթները բարեխիղճ էր կատարում, թե հիմա ինչը ոնց ա՝ ավելին չեմ կարող ասել։ Եթե մեղավոր է, ապա պետք է պատասխանատվության ենթարկվի»։
Հարցին, թե հնարավո՞ր է լինեն նոր ձերբակալություններ ոստիկանության ներկա ու նախկին աշխատակիցների շարքերում, Օսիպյանը նշեց, որ պետք չէ որևե բան բացառել:
