Ապրիլյան պատերազմի փաստաթղթերն ուսումնասիրելիս ուշագրավ նորություններ են ի հայտ եկել
Ապրիլյան պատերազմի հանգամանքներն ուսումնասիրող քննիչ հանձնաժողովն աշխատում է իր հաստատած գրաֆիկով, իսկ թե պաշտոնյաները երբ կգան, երբ չեն գա, դա հիմա քննարկելու թեմա չէ: Այս մասին այսօր՝ հուլիսի 16-ին, ԱԺ-ում լրագրողների հետ զրույցում նշեց հանձնաժողովի նախագահ Անդրանիկ Քոչարյանը:Նրա խոսքով, ամենակարեւորը նախապատրաստական փուլն է, որը համարյա ավարտին է մոտենում. ««Արդեն պատրաստվում ենք քննելու փուլին: Քննելու փուլը լիարժեք կիրացվի, երբ հանձնաժողովի անդամները մշտապես կլինեն Երեւանում: Երբ մենք պատրաստ լինենք մարդ կանչելու, կասկած չունենաք, աշխարհի որ ծայրում էլ լինեն հանձնաժողովի անդամները, նրանք կգան եւ կմասնակցեն այդ նիստերին»,-ասաց Քոչարյանը՝ հավելելով, որ այդ փուլը կսկսվի մինչեւ սեպտեմբեր:
«Մենք հիմա փաստաթղթերն ենք ուսումնասիրում, որ ճիշտ հարցեր տանք»,-ընդգծեց հանձնաժողովի նախագահը:
Հարցին, թե ինչ է անելու հանձնաժողովը, եթե նախկին պաշտոնյաներն անտեսեն հանձնաժողովի հրավերն ու չգան, նա պատասխանեց. «Լավ չեմ պատկերացնում հրաժարվելու դրդապատճառները, որովհետեւ այստեղ բարոյականության խնդիր կա: Հրաժարվել նշանակում է թաքցնել: Չեմ կարծում, որ որեւէ մեկը կընտրի այդ ճանապարհը»:
Քոչարյանը նշեց, որ փաստաթղթեր ուսումնասիրելու ընթացքում ուշագրավ նորություններ ի հայտ եկել են, սակայն կոնկրետ իր համար անակնկալներ չեն եղել. «Ինձ համար ոչ այնքան անակնկալ են եղել, բայց կարծում եմ՝ հանձնաժողովի անդամների մի մասի համար գուցե այո»:
Անդրանիկ Քոչարյանը նշեց, որ այժմ Սեյրան Օհանյանին լսելու անհրաժեշտություն չի տեսնում. «Բայց մենք ունենք հարցեր, որ պետք է տանք Սեյրան Օհանյանին, որովհետև պատասխանատուները, որոնք իր ղեկավարման տակ կայացրել են որոշակի որոշումներ, այստեղ միայն Սեյրան Օհանյանի խնդիրը չէ: Այնպես որ, կենտրոնանալ միայն Սեյրան Օհանյանի կամ Սեյրան Օհանյանի նկարահանած կլիպներին... իմաստը ես տեսնում եմ, որ պետք է լինի պարզապես ապրիլյան դեպքերին»,-ասաց հանձնաժողովի նախագահը:
