Օսիպյանը զգուշացնում է.Թույլ չենք տալու այդ տոնով խոսեն ոստիկանության հետ. կիրառել, կիրառում ու կիրառելու ենք ֆիզիկական ուժ
Այո, երեկ բախում է տեղի ունեցել, բայց միակողմանի, միայն քաղաքացիների կողմից է եղել նշեց Իջևան քաղաքում գտնվող ոստիկանապետ Վալերիյ Օսիպյանը:«Երեկ մի խումբ քաղաքացիներ օրվա ցերեկային ժամերին մոտ 5-6 անգամ տարբեր հատվածներից փակեցին ճանապարհները, և ոստիկանության ծառայողների կողմից բացատրական աշխատանքի շնորհիվ ճանապարհը բացվում էր: Բայց երեկոյան քաղաքացիների թիվը շատացել են, շուրջ 500-600 էր հասել և արդեն հրաժարվել են ոստիկանների պահանջները կատարել՝ բացել ճանապարհը»,-մանրամասնեց Օսիպյանը:
Ըստ նրա, ինքը հանձնարարել է պահպանելով օրենքի տառը՝ շղթա կազմելով քայլել առաջ, քաղաքացիներին բացատրել, որ ազատեն փակված ճանապարհի հատվածը: «Բայց օրինական պահանջը դիմավորեցին մահակներով, փայտերով, նույնիսկ՝ քարերով: Ոստիկաններից տարբեր աստիճանի մարմնական վնասվածքներով տեղափոխվել են Տավուշի բժշկական կենտրոն»,-ասաց նա:
Ոստիկանապետը նշեց, որ լրացուցիչ ուժեր են ուղարկվել Իջևան, որոնց հետ ինքն էլ է այնտեղ: Նա ասաց, որ իրավիճակի մասին զեկուցել է ՀՀ վարչապետին:
«Ինձ դիմավորեցին մոտ 30 քաղաքացի, նրանց հետ բանակցում էի, մոտ 30 րոպե: Այդ ընթացում բացատրեցի իրենց անօրինական գործողությունները: Նրանք պահանջում են, որ վերացնենք պահակակետերը, որոնք վերահսկում են Իջևանից ապօրինի ծառահատման դեպքերը: Նրանք ինձ հետ պայմանով են խոսում, ասում են՝ հրաման տվեք հանել անշարժ պահակակետերը: Բացի այդ, բերման ենթարկված մեքենաներ կան՝ մի մասը փայտով բեռնավորված, որոնք ոստիկանության բաժիններում են: Նրանք պահանջում են, որ վարորդներին և մեքենաները թողնենք, որևէ արձանագրություն չկազմենք»,-ասաց նա:
Վալերիյ Օսիպյանը նշեց, որ իրենք չեն պատրաստվում ցուցարարների պահանջը կատարել: «Ոչ թե չենք թողելու, այլ նաև միջադեպի հետ կապված քրեական գործ է հարուցվելու, պատասխանատվության են ենթարկվելու»,-ասաց նա և նշեց, որ արդեն իսկ քրգործեր են հարուցվել խուլիգանության հատկանիշներով նաև իշխանության ներկայացուցչին դիմադրություն ցուցաբերելու համար:
«Այս պահին բերման ենթարկված 19 անձ ունենք, և շարունակական են լինելու աշխատանքները մեղավորներին պատասխանատվության ենթարկելու: Մենք հանդուրժող չենք լինելու, թույլ չենք տալու նմանատիպ տոնով խոսեն ոստիկանության հետ, պետության ներկայացուցչի հետ, իրենք թելադրեն, ինչ անենք: Երկար տարիներ սովոր են եղել ոչնչացել անտառը, անօրինական զբաղվել են անտառի առքուվաճառքով»,-ասաց նա և նշեց, որ իրենց ցանկացած գործողություն լինելու է օրենքին համապատասխան:
Հանդուրժող լինելը թուլության նշան չէ: Կան քաղաքացիներ, որոնք լավ են հասկացել այն, որ ոստիկանները կանգնած են քաղաքացիների կողքին, որ մենք բոլորի ոստիկանն ենք, անգամ՝ հանցագործի: Սակայն կան մարդիկ, ովքեր այդ հանդուրժողականությունը փորձել են դիտել որպես թուլություն: Ոստիկանությունը կիրառել, կիրառում և կիրառելու է ֆիզիկական ուժ, որը նախատեսված է ՀՀ օրենքներով: Այս մասին լրագրողների հետ զրույցում հայտարարեց ՀՀ Ոստիկանապետ Վալերիյ Օսիպյանը՝ խոսելով Իջևանում երեկ տեղի ունեցած դեպքերի մասին և հավելելով, որ անհրաժեշտության դեպքում ոստիկանությունն իրավունք ունի նաև կիրառելու հատուկ միջոցներ:
