Տեսանյութ. Մեռնիմ ջանիդ, Փաշինյան ջան, ձեռքիս հացը կերել ես.2 ամսի ա սոված կմեռնեմ
Շիրակի մարզկենտրոն Գյումրիում մեկնարկել է «Իմ քայլը հանուն Շիրակի մարզի» ներդրումային բիզնես ծրագրերի ֆորումը, որին մասնակցում է վարչապետ Նիկոլ Փաշինյանը: Նրան ուղեկցում են Շիրակի մարզպետ Տիգրան Պետրոսյանը, Էկոնոմիկայի նախարար Տիգրան Խաչատրյանը, Տարածքային կառավարման և ենթակառուցվածքների նախարար Սուրեն Պապիկյանը, Գյումրու քաղաքապետ Սամվել Բալասանյանը: Նա սկզբում հանդիպեց քաղաքացիներին, ովքեր վարչապետին էին փորձում ներկայացնել իրենց խնդիրներն ու հուզող հարցերը: Սակայն վարչապետն ասաց, որ նամակները և հարցերը կարող են ներկայացնել իր օգնականին:Այնուհետև վարչապետը ծանոթացավ մարզի զբոսաշրջային պոտենցիալին, նա հետաքրքրվեց, թե տարեկան որքան զբոսաշրջիկ են ունենում և արդոք ոլորտում աճ կա:
Նրան պատասխանեցին, որ Գյումրի այցելած զբոսաշրջիկների թիվը տարեկան կազմում է մոտ 20.000. նախորդ տարվա համեմատ էլ աճ են գրանցել:
Այդ ընթացքում մի կին բղավոցով փորձում էր մոտենալ վարչապետին, սակայն թիկնապահները նրան կանգնեցրեցին: Վարչապետն, լսելով նրա ձայնը, հրահանգեց. ‹‹Մի րոպե, թողեք մոտենա այդ կինը, տեսնեմ ինչ է ուզում››:
‹‹Մեռնիմ ջանիդ, Փաշինյան ջան, ձեռքիս հացը կերել ես: Ես ծեր, թոշակով ապրող կին եմ, ստանում եմ 29 հազար դրամ: Բողոքս ‹‹Արդշինբանկից›› է, որի մասին քեզ նամակ եմ գրել: Վարկ եմ վերցրել, չոտկի մուծել եմ: Տեսա, որ 2 ամիս փող չեն տա ինձ, լրիվ քաշին:2 ամսի ա սոված կմեռնեմ››,-դժգոհեց կինը:
Վարչապետն էլ դարձյալ ասաց, որ իր օգնականը կլսի և ինչ հնարավոր է կանի:
Վարչապետը, շրջելով տաղավարներով, դարձյալ անդրադարձավ զբոսաշրջությանն ու նկատեց, որ ոլորտը արագ զարգանում է և պետք է կարողանան այն ճիշտ օգտագործել և օգուտ քաղել:
Տաղավարներից մեկի մոտ ՀՀ կառավարության ներկայացուցիչներին հրավիրեցին ձմռանը մասնակցել ձնագնդիկով բիաթլոնին, որը ծիծաղեցրեց վարչապետին: Փաշինյանին հրավերը դուր եկավ և հետաքրքրվեց, թե բիաթլոնը երբ է անցկացվում:
