Տեսանյութ. Ինչու են հեռացնում Սոչիի օդանավակայանի հայ աշխատակիցներին
Համացանցում մի տեսանյութ է տարածվել, որը վերաբերում է Սոչիի օդանավակայանի հայ աշխատակիցներին հեռացնելու թեմային:Հիշեցնենք, որ ավելի վաղ օդանավակայանի հայ աշխատակիցները նամակ էին գրել և ահազանգել, որ այն աշխատակիցներին, ովքեր ունեն հայկական արմատներ, հեռացնում են աշխատանիցք:
Դրանից հետո եղավ ինչպես օդանավակայանի, այնպես էլ Ռուսաստանում Հայաստանի դեսպանության արձագանքը: Մասնավորապես դեսպանությունից հայտնում են, որ հարցը գտնվում է իրենց ուշադրության կենտրոնում:
Ռուսաստան Դաշնությունում Հայաստանի Հանրապետության դեսպանությունը՝ կապ հաստատելով Սոչիի միջազգային օդանավակայանի շուրջ ստեղծված իրավիճակի տարբեր կողմերի հետ՝ տեղեկատվություն է ստացել հուլիսի 31-ին օդանավակայանի հայ աշխատակիցների այն հայտարարության վերաբերյալ, թե խտրականություն դրսևորելով նրանց ազատում են աշխատանքից:
«Արմենպրես»-ի հաղորդմամբ՝ այս մասին տեղեկանում են ՌԴ-ում ՀՀ դեսպանատան «Ֆեյսբուք» սոցիալական ցանցի պաշտոնական էջից:
Դեսպանատան հաղորդագրության մեջ ասվում է, որ զրույցներ են տեղի ունեցել Սոչիի համապատասխան մարմինների, օդանավակայանի ղեկավարության, իրավիճակի մասնակից քաղաքացիների խմբի և հայ համայնքի ներկայացուցիչների հետ։
Դեսպանությունը ստացել է տարբեր կողմերի պարզաբանումները, այդ թվում նաև՝ քաղաքացիների խմբի, տեղի հայ համայնքի և պատկան մարմինների կողմից։
Նշյալ հարցը գտնվում է դեսպանության ուշադրության կենտրոնում։
Երկու օր առաջ Սոչիի միջազգային օդանավակայանի ազգությամբ հայ աշխատակիցները հայտարարություն էին տարածել, որում ասված էր, որ օդանավակայանի ղեկավարությունը հայերի նկատմամբ խտրականություն է դրսևորում և արդեն երկրորդ տարին է, ինչ աշխատանքից ազատում են ազգությամբ հայ աշխատողներին:
«Ազատություն» ռադիոկայանի հայկական ծառայությունը հարցում էր կատարել Սոչիի օդանավակայան, ինչին ի պատասխան հայազգի աշխատակիցների հայտարարությունում տեղ գտած մեղադրանքները հերքվել են: Օդանավակայանից էլ նշել են, որ օդանավակայանի անձնակազմը բազմազգ է, և կադրային քաղաքականությունը ընկերությունում համապատասխանում է Ռուսաստանի օրենսդրությանը:
