Էրդողանը կարգադրել է բացել Նախիջևանի հետ սահմանը
Փետրվարի 25-ին Բաքվում Թուրքիայի նախագահ Ռեջեփ Թայիփ Էրդողանի և Ադրբեջանի նախագահ Իլհամ Ալիևի հանդիպման ժամանակ քննարկվել է Նախիջևանի Ինքնավար Հանրապետության ուղղությամբ Թուրքիայի սահմանին քաղաքացիների և բեռնատարների մուտքի սահմանափակման հարցը: Այս մասին տեղեկացնում է minval.az կայքը:Նշվում է, որ ստեղծված իրավիճակի հետ կապված` Իլհամ Ալիևն այս հարցը բարձրացրել է Էրդողանի հետ հանդիպման ժամանակ:
Թուրքիայի նախագահը համապատասխան հրամաններ է տվել իր երկրի պետական կառույցներին, և փետրվարի 26-ին` ժամը 15:10-ի դրությամբ, թուրք-ադրբեջանական սահմանը կրկին բացվել է:
Ինչպես ավելի վաղ տեղեկացրել էինք, փետրվարի 24-ին նոր տեսակի կորոնավիրուսի տարածման վտանգի պատճառով Թուրքիան և Իրանը փակել էին Նախիջևանի հետ սահմանը, և այն հայտնվել էր ցամաքային շրջափակման մեջ: