ԵՄ-ն ողջունում է. Հայաստանը միացել է Թուրքիայի դեմ Եվրամիության պատժամիջոցներին
Հայաստանը, Հյուսիսային Մակեդոնիան, Չեռնոգորիան, Ալբանիան և Իսլանդիան միացել են Թուրքիայի դեմ Եվրամիության պատժամիջոցներին՝ կապված Կիպրոսի Հանրապետության բացառիկ տնտեսական գոտում Թուրքիայի կողմից իրականացվող ապօրինի որոնողական, հորատման աշխատանքների հետ։ Այս մասին, ինչպես գրում է Tass-ը, ասվում է ԵՄ արտաքին հարաբերությունների և անվտանգության հարցերով բարձր ներկայացուցիչ Ջոզեֆ Բորելի հայտարարության մեջ։«ԵՄ անդամագրության համար թեկնածու երկրներ Հյուսիսային Մակեդոնիան, Չեռնոգորիան և Ալբանիան, ԵՄ տնտեսական գոտում ընդգրկված Իսլանդիան, ինչպես նաև Հայաստանը միացել են ԵՄ խորհրդի այս որոշմանը։ Նրանք կապահովեն, որ իրենց ազգային քաղաքականությունը համապատասխանի ԵՄ որոշմանը։ ԵՄ-ն ի գիտություն է ընդունում այդ պարտավորությունը և ողջունում այն»,- ասել է Բորելը։
Նշվում է, որ Եվրամիությունը փետրվարի վերջին ընդլայնեց պատժամիջոցները Թուրքիայի դեմ՝ Կիպրոսի Հանրապետության տարածքում հորատման գործողությունների համար: Սահմանափակող միջոցներ են ձեռնարկվել Թուրքիայի պետական նավթային ձեռնարկության TPAO (Turkish Petroleum Corporation) փոխնախագահի և հետախուզական վարչության պետ Մեհմեթ Ֆերուխ Աքալինի, ինչպես նաև գերատեսչությունում նրա տեղակալի՝ Ալի Կոսկուն Նամօղլուի դեմ:
Հիշեցնենք, որ բնական գազի մեծ պաշարներ են հայտնաբերվել Կիպրոսի Հանրապետության բացառիկ տնտեսական գոտում: Սեպտեմբերին, կղզու կառավարությունը պայմանագիր է կնքել ֆրանսիական Total ընկերության և իտալական Eni ընկերության հետ։ Սակայն, հոկտեմբերի սկզբին Թուրքիան իր սեփական հորատման նավը ուղարկեց այդ տարածք՝ այն ուղեկցելով ռազմանավերով:
Թուրքիան, որը չի ճանաչել Կիպրոսի Հանրապետությունը 1963 թվականից ի վեր, վիճարկում է այս կղզու պետության բացառիկ տնտեսական գոտու տարածքն ու հայտարարում, որ թույլ չի տա կատարել երկրաբանական ուսումնասիրություններ կղզու ափերից դուրս՝ առանց Կիպրոսի թուրքական համայնքի համաձայնության:
