Բաքուն բողոք է ներկայացրել Թեհրանին` սոցիալական ցանցերում ապատեղեկատվության համար
Ադրբեջանի փոխարտգործնախարար Խալաֆ Խալաֆովը նախօրեին հեռախոսազրույց է ունեցել իր իրանցի գործընկեր Աբաս Արագչիի եւ Բաքվում Իրանի դեսպան Ջավադ Ջահանգիրզադեի հետ:Ինչպես հաղորդում է contact.az-ը, վկայակոչելով Ադրբեջանի արտաքին գործերի նախարարության մամուլի ծառայությունը, հեռախոսազրույցի ընթացքում քննարկվել են սոցիալական ցանցերում տարածված տեսագրությունները, որոնք, իբր, արվել են Լեռնային Ղարաբաղում: Տեսանյութում իրանական բեռնատարները, ենթադրաբար, վառելիք եւ սնունդ են տեղափոխում:
Տեսագրությունները լուրջ մտահոգությունների առիթ են դարձել Ադրբեջանի կառավարությունում եւ դծգոհություն են առաջացրել հանրության շրջանում, ասել է Խալիֆովը: Ըստ նրա` նման գործողություններն ուղղված են «օկուպանտ երկիր Հայաստանին աջակցությանը եւ հակամարտության սրմանը»: Ադրբեջանի ԱԳՆ-ում ակնկալում են, որ իրանական կողմը հետաքննություն կանցկացնի եւ կպարզաբանի այս հարցը:
Իրանի փոխնախարարն, իր հերթին, տեսանյութն ապատեղեկատվություն է անվանել: Արագչին դժգոհել է «թշնամիների առկայությունից Իրան-Ադրբեջան բարեկամական հարաբերություններում», որոնք էլ տարածում են նման ապատեղեկատվությունը:
