Իշխանության հույսերը չեն արդարացել. Աբրահամ Մանուկյանը Ծառուկյանի դեմ ցուցմունք չի տվել.«Հրապարակ»
«Հրապարակ» թերթը գրում է. «ԲՀԿ-ական նախկին պատգամավոր Աբրահամ Մանուկյանին կալանքի տակ են պահում Գագիկ Ծառուկյանի դեմ ցուցմունք կորզելու հույսով։ Սակայն մինչ այս պահն իշխանությունների հույսերը չեն արդարացել՝ Մանուկյանը ցուցմունք չի տալիս։ Նրան մեղադրանք է առաջադրվել ՀՀ ՔՕ 38-154.2 հոդվածով՝ ընտրակաշառք տալուն օժանդակելու համար:Դատարանը (դատավոր` Կարեն Ֆարխոյան) հունիսի 27-ին կալանքի սանկցիա տվեց։ Մանուկյանը գտնվում է «Երևան-Կենտրոն» ՔԿՀ-ում: Ըստ մեղադրանքի, 2017-ին Ծառուկյանը հրավիրել է ԲՀԿ-ի՝ Գեղարքունիքի մարզում պատգամավորի թեկնածու Վազգեն Պողոսյանին և առաջարկել, որ մասնակցի ընտրություններին՝ մարզում 9 հազար ձայն ապահովելով։
«Անհրաժեշտ ծախսերն ապահովելու համար» Պողոսյանը դիմել է Սեդրակ Առուստամյանին և Աբրահամ Մանուկյանին։ Վազգեն Պողոսյանը պատմել է, որ նրանցից ստացել է 10 հազարական դրամներից բաղկացած տրցակ՝ 90 միլիոն դրամ։ «Ձայների ապահովման համար» գումարը բաժանել է ԲՀԿ անդամներին ու ակտիվիստներին, որոնք էլ պետք է բաժանեին ընտրողներին։ Բայց ուշագրավ է, որ Պողոսյանն առաջին, երկու անգամները հստակ ցուցմունք չի տվել Մանուկյանի դեմ, միայն երրորդ անգամ՝ հունիսի 8-ին է ասել, որ Մանուկյանից գումար է ստացել, մեկ շաբաթ հետո կրկին հետ է վերցրել խոսքերը՝ ասելով, որ հստակ չի կարող ասել՝ դա կաշառքի՞, թե՞ շտաբի օրինական ծախսերի գումարն էր: Առերեսման ժամանակ էլ չի պնդել, որ Մանուկյանից որպես կաշառք գումար է ստացել։
Հիշեցնենք, որ Վազգեն Պողոսյանը «Երևանշին» ընկերության խորհրդի նախագահն է, մեղադրվում է քաղշինկոմիտեի նախկին նախագահ Վահագն Վերմիշյանին կաշառք տալու մեջ։ Հենց այդ գործի շրջանակներում են փետրվարին ԲՀԿ-ին վերաբերող փաստաթղթեր գտել Պողոսյանի մոտ, իսկ ապրիլի 1-ին նրա կալանքի միջոցը փոխեցին»:
Մանրամասնեը թերթի այսօրվա համարում։
