Արդյոք Երեւանը մտահոգվա՞ծ է Թուրքիայի՝ հակամարտությունում հնարավոր ավելի ուղղակի միջամտությամբ
Հայաստանը լիովին հանձնառու է Լեռնային Ղարաբաղի հակամարտության խաղաղ կարգավորմանը. պատերազմը տարբերակ չէ։ Այս մասին «France 24» լրատվամիջոցին տված հարցազրույցում նշել է Հայաստանի ԱԳ նախարար Զոհրաբ Մնացականյանը:«Պատերազմն իսկական աղետ կլինի ամբողջ տարածաշրջանի համար։ Հայաստանն ու Արցախն ունեն պաշտպանվելու կարողություն։ Սակայն պատերազմը պետք է ամբողջությամբ բացառվի։ Մենք լիովին հանձնառու ենք հարցի խաղաղ կարգավորմանն այնպիսի մոտեցմամբ, որ Հայաստանի, Արցախի, ինչպես նաեւ Ադրբեջանի շահերը հավասարապես կհասցեագրվեն: Մենք աշխատում ենք փոխզիջման վրա հիմնված լուծման ուղղությամբ եւ շարունակելու ենք ջանքեր ներդնել խաղաղ կարգավորման համար: Սա եղել եւ մնում է Հայաստանի հանձնառությունը»,-ասել է նա:
Հարցին, թե Թուրքիայի նախագահ Ռեջեփ Թայիբ Էրդողանը կարող է լինել այս լարվածության իրական պատճառը, Մնացականյանը պատասխանել է. «Սա շատ մտահոգիչ է, քանի որ մենք ականատես ենք եղել Թուրքիայի ապակայունացնող դերին իր հարեւանությունում՝ Արեւելյան Միջերկրական, Հյուսիսային Աֆրիկա, Մերձավոր Արեւելք: Այժմ մենք ականատես ենք լինում անկայունության այս գործոնը մեր տարածաշրջան՝ Հարավային Կովկաս տեղափոխելու փորձին: Այս փորձը նաեւ ներկայացվում է Հարավային Կովկասում Թուրքիայի «պատմական առաքելության» լույսի ներքո:
Այժմ դուք հասկանում եք, որ նման «պատմական առաքելությունը» Հայաստանի մոտ արթնացնում է վերջին դարասկզբին իրականացված Հայոց ցեղասպանության տխուր հիշողություններ, եւ իհարկե, մենք խիստ մտահոգված ենք այդ առնչությամբ: Մենք նաեւ ականատես ենք լինում, որ հայերի դեմ իրականացված այդ ոճրագործության անպատժելիությունն է հիմք տալիս Թուրքիային հստակորեն պնդելու Հարավային Կովկասում որեւէ դերակատարության վրա:
Հարցին, թե արդյոք ունի՞ մտահոգություն, որ Թուրքիան կարող է ավելի անմիջական դեր խաղալ Ադրբեջանի հետ հակամարտության հարցում, ներառյալ ռազմական ճանապարհով, ՀՀ ԱԳ նախարարն արձագանքել է. «Այս հարցում Թուրքիան որեւէ դերակատարում չունի: Խաղաղ կարգավորումը վերաբերում է Հայաստանին, Արցախին եւ Ադրբեջանին, եւ Արցախի հետ միասին մենք շատ կառուցողական ձեւով կշարունակենք սերտ համագործակցել Ադրբեջանի հետ լուծում գտնելու ուղղությամբ: Մենք պետք է աշխատենք հրադադարի կայուն ամրապնդման ուղղությամբ, մենք պետք է Ադրբեջանից լսենք ուժի սպառնալիքի կամ ուժի կիրառման մերժում: Մենք պետք է աշխատենք այնպիսի միջավայրի վրա, որը նպաստում է բանակցություններում առաջընթացին:
Մենք պետք է աշխատենք պարտավորությունների այնպիսի հավասարակշռության ուղղությամբ, որը կնպաստի համաչափ փոխզիջման հասնելուն, պետք է լինի փոխզիջման վրա հիմնված լուծում, որին Ադրբեջանի առավելապաշտական կեցվածքը չի նպաստում: Ուստի, մենք շարունակելու ենք այդ ուղղությամբ աշխատել միջազգային մանդատ ունեցող ԵԱՀԿ Մինսկի խմբի համանախագահության ձեւաչափի շրջանակում: Մենք բարձր ենք գնահատում համանախագահների՝ Ֆրանսիայի, Ռուսաստանի եւ Միացյալ Նահանգների դերը, եւ նրանց շատ կայուն ներդրումը, հանձնառությունն ու ներգրավվածությունը: Այս ձեւաչափի շրջանակներում մենք կշարունակենք աշխատել խաղաղության ուղղությամբ»:
Ճշտող հարցին, թե արդյոք Երեւանը մտահոգվա՞ծ է Թուրքիայի՝ հակամարտությունում հնարավոր ավելի ուղղակի միջամտությամբ, Մնացականյանն ասել է. «Ակնհայտորեն մենք անտարբեր չենք կարող լինել, քանի որ դա կարող է լինել միայն անկայունության դեր, եւ, իհարկե, մենք չենք կարող անտարբերությամբ վերաբերել դրան. դա, անշուշտ, անհանգստության տեղիք է տալիս»:
