Կարանտինի ընթացքում ՀՀ-ում կարող են ավելի խիստ կանոններ սահմանվել. ԱՆ
ՀՀ կառավարությունը հանրապետությունում վարակիչ հիվանդությունների տարածման եւ բռնկման, ինչպես նաեւ արտակարգ իրավիճակների դեպքում կկարողանա կարանտին հայտարարել ամբողջ հանրապետությունում, սահմանային անցակետերում, ինչպես նաեւ երկու կամ ավելի մարզերում: Այս մասին ՀՀ Ազգային ժողովում Պետաիրավական հարցերի մշտական խորհրդարանական հանձնաժողովի նիստին «Հայաստանի Հանրապետության բնակչության սանիտարահամաճարակային անվտանգության ապահովման մասին» եւ հարակից օրենքներում փոփոխություններ եւ լրացումներ կատարելու մասին օրենքի նախագծերի փաթեթի քննարկմանն ասաց ՀՀ արդարադատության փոխնախարար Ռաֆիկ Գրիգորյանը:Կարանտին հայտարարելու դեպքում մուտքի եւ ելքի հատուկ ռեժիմ է սահմանվում` սահմանը հատելու ժամանակավոր սահմանափակում կամ արգելք, սահմանափակվում է քաղաքացիների եւ տրանսպորտային միջոցների տեղաշարժի ազատությունը, քաղաքացիների մեկուսացում եւ ինքնամեկուսացում է մտցվում:
Բացի այդ, անհրաժեշտության դեպքում կարող են ավելի խիստ կանոններ սահմանվել, ինչպիսիք են զանգվածային եւ հասարակական միջոցառումների անցկացման եւ դրանց մասնակցության սահմանափակումները, իրավաբանական անձանց, ուսումնական հաստատությունների, տեղական եւ պետական մարմինների գործունեության սահմանափակումը, ինչպես նաեւ ապրանքաշրջանառության սահմանափակումը:
