Իրանը միջուկային գործարքին վերադառնալու համար ոչ մի նախապայման չի ընդունի
Թեհրանը Գործողությունների համատեղ համապարփակ ծրագրին (ԳՀՀԾ) վերադառնալու համար ոչ մի նախապայման չի ընդունի: Այս մասին հայտարարել է Իրանի նախագահ Հասան Ռոհանին, փոխանցում է ՏԱՍՍ-ը։«Մենք ոչ մեկից ոչ մի նախապայման չենք ընդունի»,- ասել է նա՝ պատասխանելով ԱՄՆ հաջորդ նախագահի կողմից Իրանի հրթիռային ծրագրի վերաբերյալ սահմանափակումները որպես միջուկային գործարքին վերադառնալու պայման ներառելու հնարավոր պահանջի մասին հարցին։
Ռոհանիի խոսքով՝ «կողմերը միջուկային գործարքի մասին ավելի վաղ են պայմանավորվել»:
«Կա՛մ մենք կիրականացնենք այդ համաձայնագիրը, կա՛մ՝ ոչ»,- նշել է նա:
Ռոհանին նաև հայտարարել է, որ Իրանը խնդիրներ չի ունենա ԳՀՀԾ-ի պայմանների կատարման շուրջ, եթե ԱՄՆ-ն որոշի վերադառնալ համաձայնագրին։
2015 թվականի հուլիսի 14-ին «վեցյակը» (Մեծ Բրիտանիա, Գերմանիա, Չինաստան, Ռուսաստան, ԱՄՆ, Ֆրանսիա) և Իրանը հայտարարել են Գործողությունների համատեղ համապարփակ ծրագրի ձեռքբերման մասին:
2018 թվականի մայիսին ԱՄՆ-ն հայտարարել է դրանից միակողմանի դուրս գալու և իսլամական հանրապետության դեմ խիստ պատժամիջոցների վերականգնման մասին:
Իրանը մայիսի 8-ին հայտարարել է Իրանի միջուկային ծրագրի վերաբերյալ Գործողությունների համատեղ համապարփակ ծրագրի (ԳՀՀԾ) մի շարք կետերի կատարման դադարեցման մասին։
