Կորոնավիրուսի դեմ պատվաստումից հետո արյան հազվադեպ հիվանդություն են գրանցել
Թրոմբոցիտոպենիայի՝ արյան հազվագյուտ հիվանդության ավելի քան երկու տասնյակ դեպքեր են գրանցվել ԱՄՆ-ում կորոնավիրուսի դեմ պատվաստանյութեր ստացած մարդկանց մոտ: Սակայն պատվաստանյութերի եւ թրոմբոցիտները ախտահարող հիվանդության միջեւ կապը չի ապացուցվել:Հունվարի վերջին Vaccine Adverse Event Reporting System (VAERS) համակարգում գրանցվել էր թրոմբոցիտների քանակի նվազման 32, թրոմբոցիտոպենիայի 14 եւ իմունային թրոմբոցիտոպենիայի 11 դեպք այն մարդկանց մոտ, ովքեր Pfizer-ի կամ Moderna-ի արտադրած պատվաստանյութեր էին ստացել ԱՄՆ-ում: Հարկ է նշել, որ ԱՄՆ-ում պացիենտներն արդեն կորոնավիրուսի դեմ ավելի քան 43 միլիոն չափաբաժին պատվաստանյութ են ստացել:
Ինչպես հայտնում է Newsweek.com-ը, անցյալ ամիս Ֆլորիդայում տղամարդը մահացել էր այն բանից հետո, երբ կորոնավիրուսի դեմ պատվաստվելուց օրեր անց նրա մոտ թրոմբոցիտոպենիա էր զարգացել: Բացի այդ, Մայամիից 56-ամյա Գրեգորի Մայքլի մոտ Pfizer-BioNTech պատվաստանյութի ներարկումից մի քանի օր անց ի հայտ էին եկել այնպիսի խանգարման ախտանիշեր, որը կոչվում է իդիոպատիկ թրոմբոցիտոպենիկ պուրպուրա (ԻԹՊ): Նա մահացել էր երկու շաբաթ անց՝ գլխուղեղում արյունազեղումից:
Ի՞նչ է թրոմբոցիտոպենիան
Թրոմբոցիտոպենիան հազվագյուտ հիվանդություն է, որի դեպքում արյան մեջ թրոմբոցիտների քանակը նվազում է: Թրոմբոցիտները իրենցից ներկայացնում են բջիջներ, որոնք անհրաժեշտ են թրոմբների առաջացման համար՝ գործընթաց, որն անհրաժեշտ է վնասված տեղից արյունահոսությունը կանխելու համար:
Թրոմբոցիտների աջակցության ասոցիացիայի (PDSA) տվյալներով՝ ԱՄՆ-ում մոտ 100 000 մարդ տառապում է այդ հիվանդությամբ:
Ի՞նչն է առաջացնում թրոմբոցիտոպենիա
Թրոմբոցիտոպենիան կարող է փոխանցվել ժառանգաբար: Սակայն հիվանդությունը կարող է զարգանալ նաեւ վարակի, հիվանդության կամ դեղամիջոցների նկատմամբ ոչ պատշաճ իմունային պատասխանի հետեւանքով Այս դեպքում խոսքը իմունային թրոմբոցիտոպենիայի կամ իդիոպատիկ թրոմբոցիտոպենիկ պուրպուրայի մասին է: ԻԹՊ-ն ստիպում է արյան սպիտակ բջիջներին, որոնք ստեղծում են վարակի դեմ պայքարող հակամարմիններ, հարձակվել հիվանդի սեփական թրոմբոցիտների վրա:
Թրոմբոցիտոպենիայի ախտանիշները
Թրոմբոցիտոպենիայի ախտանիշները ներառում են մաշկի տակ գտնվող արյունահոսող հատվածների կապտուկներ, հարթ կարմիր բծեր եւ կղանքի կամ մեզի մեջ արյան առկայություն: Սակայն այս ախտանիշները կարող են հայտնվել միայն այն դեպքում, երբ թրոմբոցիտների քանակը իջնում է վտանգավոր ցածր մակարդակի:
Թրոմբոցիտների նորմալ քանակը տատանվում է 150 000-ից 450 000 թրոմբոցիտների միջեւ՝ մեկ միկրոլիտր արյան մեջ, իսկ հիվանդության ախտանիշները կարող են հայտնվել միայն այն դեպքում, երբ թրոմբոցիտների քանակը մեկ միկրոլիտրի մեջ ընկնում է 10 000-ից ցածր: Այս դեպքում արյունահոսությունը կամ կապտուկը կարող են առաջանալ առանց ակնհայտ պատճառի:
