Եթե Հայաստանը շարժվի այս ուղղությամբ, այս երկիրը և նրա ժողովուրդը կշահեն տարածաշրջանի կայունությունից ու տնտեսական զարգացումից
Թուրքմենստանի իր գործընկեր Ռաշիդ Մերեդովի հետ համատեղ մամուլի ասուլիսում Թուրքիայի արտգործնախարար Մևլյութ Չավուշօղլուն անդրադարձել է նաև Արցախում տեղի ունեցած վերջին իրադարձություններին:Լրագրողի հարցին, թե հնարավո՞ր է Թուրքիայի, Ադրբեջանի և Թուրքմենստանի միջև Լեռնային Ղարաբաղի հարցով համագործակցության ծրագիր, Չավուշօղլուն պատասխանել է. «Այժմ կա խաղաղության, տարածաշրջանային զարգացման, վերականգնման և կայունության հնարավորություն: Մեր կոչը միշտ եղել է այս ուղղությամբ: Եթե Հայաստանը շարժվի այս ուղղությամբ, այս երկիրը և նրա ժողովուրդը կշահեն տարածաշրջանի կայունությունից ու տնտեսական զարգացումից: Մենք ակնկալում ենք, որ Հայաստանը կգործի՝ այս ամենը հաշվի առնելով: Ադրբեջանի հետ մենք դրականորեն կարձագանքենք այն դրական քայլերին, որոնք Հայաստանը կկատարի»:
Չավուշօղլուն հաստատել է Թուրքիայի անվերապահ աջակցությունը Ադրբեջանին և ասել, որ Թուրքիան նաև կաջակցի տարածաշրջանի վերականգնմանը, Լեռնային Ղարաբաղի խաղաղությանն ու բարգավաճմանը: Նա նաև ասել է, որ այս թեմայի շուրջ զարգացումները քննարկվել են երկկողմ և եռակողմ հանդիպումների ընթացքում:
Թուրքիայի արտգործնախարարի խոսքով՝ այժմ աշխատանքներ են տարվում Վրաստանին գործընթացում ներգրավելու ուղղությամբ:
«Հուսով եմ, որ Վրաստանը նույնպես կմասնակցի: Տարածաշրջանում խաղաղության ու կայունության հաստատումից հետո այդ նախագծերի իրականացումը կարագանա, ինչից կշահեն բոլորը»,- ասել է նա:
