Եթե ռազմական հեղաշրջման փորձ անեին, ապա զորք պետք է լիներ առնվազն Երեւանում. Կիրո Մանոյան
ԶՈՒ գլխավոր շտաբի հայտարարությունը վկայությունն էր այն խնդիրների, որ ԳՇ-ն համբերատար, լռությամբ տարել է պատերազմի հենց սկզբից: Այս մասին, այսօր՝ փետրվարի 26-ին, Բաղրամյան պողոտայում լրագրողների հետ զրույցում նշեց ՀՅԴ Հայ դատի եւ քաղաքական հարցերի պատասխանատու Կիրո Մանոյանը:«Գիտենք, որ ԳՇ պետը պատերազմը սկսելուց 4 օր հետո արդեն ասել է, որ այս վիճակը ծանր է, պետք է վայրկյան առաջ պատերազմը կանգնեցնել: Բայց վարչապետը, քանի որ ապրում է այլ իրականության մեջ, համաձայն չի եղել: Այն վերաբերմունքը, որ ցուցաբերել էր վարչապետը ԳՇ պետի առաջին տեղակալի նկատմամբ, դա արդեն համբերության բաժակը լցրել էր»,-ասաց նա:
Մանոյանը Անդրադառնալով վարչապետի հայտարարությանը, թե տեղի ունեցածը ռազմական հեղաշրջման փորձ է, Մանոյանն ասաց. «Եթե այդպիսի բան անեին, ապա զորք պետք է լիներ առնվազն Երեւանում: Նման փորձ չի եղել»:
Ինչ վերաբերում է երեկ վարչապետի կազմակերպած հանրահավաքին, նա ասաց. «Ինքը ունեցել է ցանկություն ուժի ցուցադրություն անել եւ երեկ հարմար պահ էր համարել ու իրեն աջակցող օլիգարխների աջակցությամբ կարողացել էր որոշ թիվ ապահովել: Իսկ մինչ իր հավաքի սկսելը, այն երթը, որ կազմակերպեց Ազատության հրապարակի կողքով, սադրանք էր եւ ճիշտ չէր»:
