Սեքսուալ բնույթի բռնի գործողություններ.ՌԴ-ում քրգործ է հարուցվել դուստրերի կողմից սպանված Միխայիլ Խաչատուրյանի դեմ
Ռուսաստանի Քննչական կոմիտեն հետմահու քրեական գործ է հարուցել Միխայիլ Խաչատուրյանի դեմ։ Ռիա նովոստին հայտնել է գործընթացին մասնակցող փաստաբաններից մեկը, ով չի ցանկացել, որ անունը նշվի։«Խաչատուրյանի դեմ քրեական գործ է հարուցվել ՌԴ քրեական օրենսգրքի 132-րդ հոդվածի 3-րդ մասով՝ «Սեքսուալ բնույթի բռնի գործողություններ», 133-րդ՝ «Սեքսուալ բնույթի գործողություններին հարկադրել» և 117-րդ՝ «Կտտանքներ» հոդվածներով»,- հստակեցրել է գործակալության աղբյուրը:
Ռիա նովոստին գրում է, որ դեռևս չունի այս տեղեկատվության պաշտոնական հաստատում։
Մոսկվայում 2018 թ. հուլիսի 27-ին Քրիստինան, Անգելինան և Մարիան սպանել են իրենց հոր՝ 57-ամյա Միխայիլ Խաչատուրյանին՝ դանակով հարվածելով պարանոցին և կրծքավանդակին։ Աղջիկները խոստովանել են իրենց կատարած հանցանքը և բացատրել, որ նա երկար ժամանակ իրենց բարոյական տառապանքներ է պատճառել։ 2018 թ. սեպտեմբերի 27-ին դատարանը փոխել էր Խաչատուրյան երեք քույրերի խափանման միջոց կալանքը և ընտրել որոշակի գործողություններ կատարելու արգելքի տեսքով խափանման միջոց։ Ավելի ուշ քույրերն ազատվել էին նաև էլեկտրոնայիան շղթայից:
